چیئرمین آئی پی پی جہانگیرترین کا کہنا ہے کہ جنوبی پنجاب صوبہ بنا کر یہاں کی محرومیوں کا ازالہ کرینگے۔

تفصیلات کے مطابق چیئرمین استحکام پاکستان پارٹی جہانگیر ترین نے لودھراں کے حلقہ این اے 155 میں انتخابی مہم کا آغازکردیا۔

جہانگیر ترین سے امیدوار برائے صوبائی اسمبلی پی پی 228 نذیر خان بلوچ، امیدوار برائے صوبائی اسمبلی پی پی 227 مہر اشرف سیال اورلودھراں سے آئی پی پی رہنماؤں، کارکنوں نے ملاقات کی۔

ملاقات کے دوران جہانگیرترین نے بھرپور طریقے سے انتخابی مہم چلانے کا عزم کرتے ہوئے کہا کہ سیاسی مخالفت کی وجہ سے رکنے والے ترقیاتی منصوںے پایہ تکمیل تک پہنچائیں گے، لودھراں کے عوام نے مجھے ہمیشہ عزت دی۔

جہانگیر ترین نے کہا کہ ہم نے نوجوانوں کو روزگار کی فراہمی کے لئے ٹھوس منصوبہ بندی کی ہے، معیشت کو طاقتور کرنا اور مہنگائی کو کنٹرول کرنا ہماری اولین ترجیح ہے۔

انھوں نے کہا کہ زراعت ہماری ریڑھ کی ہڈی، کسانوں کو انکا حق دیں گے، جنوبی پنجاب صوبہ بنا کر یہاں کی محرومیوں کا ازالہ کرینگے، ہم نے اجتماعی کام کرنے ہیں جس سے عوام خوشحال ہو۔ اگرملک تگڑا ہوگا تو ہم بھی تگڑے ہونگے۔

جہانگیر ترین کل لودھراں اور ملتان کے مختلف علاقوں میں وکررز سے ملاقاتیں کرینگے۔