فرانس کی نئی وزیر تعلیم امیلیا اوڈیا کیسٹیرا پر بچوں کو پرائیویٹ اسکول بھیجنے پر تنقید کی زد میں آگئی ہیں۔

غیر ملکی خبر رساں ادارے کے مطابق فرانس کی نئی وزیر تعلیم امیلیا اوڈیا کیسٹیرا پر بچوں کو پرائیویٹ اسکول بھیجنے کے فیصلے پر دباؤ بڑھ رہا ہے۔

رپورٹ کے مطابق ‎گزشتہ ہفتے کابینہ نے سابق جونیئر ٹینس چیمپئن کو وزارت تعلیم کا عہدہ بھی دے دیا تھا جب کہ ان کے پاس وزیر کھیل کا عہدہ بھی ہے۔

‎نئی ذمہ داریوں کے ساتھ امیلیا اوڈیا کیسٹیرا پیرس میں نہ صرف 2024 کے اولمپکس کی تیاریوں کی قیادت کررہی ہیں بلکہ فرانسیسی سیاست کے سب سے حساس معاملے کو بھی دیکھ رہی ہیں۔

‎وزیر تعلیم کے مطابق بچوں کو پرائیویٹ اسکول بھیجنے کا انتخاب اس لیے کیا کیونکہ ان کے ایک بیٹے کے اسکول میں غیرحاضری کے وقت متبادل استاد کا انتظام موجود نہیں تھا۔

بطور وزیر تعلیم پیرس کے ایک اسکول کے پہلے دورے پر صحافیوں سے گفتگو کرتے ہوئے انہوں نے کہا کہ وہ ملک بھر میں دیگر سیکڑوں خاندانوں کی طرح تنگ آچکی ہیں۔

امیلیا اوڈیا کیسٹیرا کی شادی فرانسیسی دوا ساز کمپنی کے صدر سے ہوئی ہے جن سے ان کے تین بچے ہیں جو پیرس میں ان کے گھر کے قریب ہی ایک کیتھولک ادارے میں تعلیم حاصل کررہے ہیں۔

یہ پرائیوٹ اسکول گذشتہ سال سے ہی وزارت تعلیم کے زیر تفتیش ہے کیونکہ اسکول میں کئی ہم جنس پرستانہ اور جنسی زیاتی کے کیسز رپورٹ ہوئے ہیں۔