وسطی چین کے صوبہ ہینان میں کوئلے کی کان میں دھماکے سے 10 افراد ہلاک اور 6 لاپتہ ہوگئے۔

غیر ملکی خبر رساں ادارے کے مطابق جمعے کو تقریباً 2 بج کر 44 منٹ پر کوئلے کی کان میں ممکنہ طور پر گیس کی وجہ سے دھماکہ ہوا جس کے نتیجے میں کان میں کام کرنے والے 10 مزدور ہلاک اور 6 لاپتہ ہوگئے۔

رپورٹ کے مطابق ریسکیو آپریشن جاری ہے اور لاپتہ افراد کو تلاش کرنے کی پوری کوشش کی جارہی ہے جب کہ دھماکے کے وقت کان میں 425 افراد کام کررہے تھے۔

رپورٹ میں کہا گیا ہے کہ کان کے انچارج کو حکام نے اپنی تحویل میں لے لیا ہے جس سے پوچھ گچھ جاری ہے۔

خیال رہے کہ حالیہ دہائیوں میں چین میں کان کنی کے حفاظتی اقدامات میں بہتری آئی ہے جن کو میڈیا نے بڑی کوریج دی ہے جب کہ کئی حادثات ایسے بھی ہیں جن کو میڈیا نے نظر انداز کردیا۔

سرکاری اعداد و شمار کے مطابق سال 2022 میں 168 حادثات رونما ہوئے تھے جن کے باعث 245 افراد اپنی جان کی بازی ہار بیٹھے تھے۔

گزشتہ ماہ شمال مشرقی ہیلونگ جیانگ صوبے کے جیکسی شہر کے مضافات میں کان کنی کے ایک حادثے میں 12 افراد ہلاک اور 13 زخمی ہوگئے تھے۔

نومبر میں اسی صوبے میں کوئلے کی ایک اور کان میں ہونے والے حادثے میں 11 افراد ہلاک ہوگئے تھے جب کہ ستمبر میں جنوب مغربی چین کے صوبہ گوئژو میں کوئلے کی کان میں آگ لگنے سے 16 افراد ہلاک ہوگئے تھے۔