سابق وزیراعظم شہبازشریف کا کہنا ہے کہ ترقی ایسے نہیں ہوتی، ترقی دن رات مل کے امانت اور دینات مانگتی ہے۔

صدرمسلم لیگ ن شہبازشریف نے احمدپورشرقیہ میں جلسے سے سرائیکی زبان میں خطاب کرتے ہوئے کہا ہے کہ سخت سردی میں جیسے آپ لوگوں نے میرا استقبال کیا، میری تھکن ختم ہو گئی، میں آپ کا غلام ہوگیا۔ عوام کی خدمت کرنا ہمارا فرض تھا۔  2018 میں نوازشریف کی حکومت ختم کی گئی، نوازشریف نے اپنے دور میں پنجاب کی خدمت کی۔

شہبازشریف نے کہا کہ نوازشریف نے سڑکیں اور موٹروے بنائے، اللہ نے موقع دیا تو الیکشن کے بعد بہاول پور میں بہت جدید ٹرانسپورٹ چلائیں گے۔ نوازشریف نے ہراسپتال میں ادویات اور مشنیں مفت فراہم کیں۔ گذشتہ حکومت نے ادویات، تعلیم اور دیگر چیزیں بند کردیں کیوں کہ وہ نوازشریف کا پروگرام تھا۔

صدرمسلم لیگ ن نے کہا کہ 2008 سے لے کر2018 تک جیسے ہم نے عوام کی خدمت کی، انشااللہ الیکشن کے بعد یہ خدمت جاری رکھیں گے۔ غریب کسانوں کو بیس ہزار ٹریکٹر، فی دو لاکھ روپے ٹریکٹرسبسڈی دی وہ بھی نوازشریف کا منصوبہ تھا، اللہ نے موقع دیا تو جیسے ہم نے بغیرسود کے قرضے دیے اس مرتبہ نوازشریف کی قیادت میں چھوٹے کسانوں کے لیے کاروبار کرنے کے لیے قرضے فراہم کریں گے۔

شہبازشریف نے کہا کہ اس ملک میں کروڑوں بچے اور بچیوں کو پنجاب اسکلز ڈیویملپمنٹ کے تحت کسی کو ٹیکسٹائل، آئی ٹی ایکسپرئٹ بنایا انشااللہ اس پروگرام کو مزید کئی گنا جاری رکھیں گے۔ یہ پروگرام نوازشریف لے کرآ رہے ہیں اوراحمد پورشرقیہ میں ایک شانداراسپتال بنا کردیں گے۔