متحدہ عرب امارات کے شیخ محمد راشد المکتوم نے غزہ کو 43 ملین درہم کی خوراک کی امداد کی ہدایت جاری کر دی ہے۔

خلیجی میڈیا کے مطابق متحدہ عرب امارات کے نائب صدر اور وزیر اعظم اور دبئی کے حکمران شیخ محمد بن راشد المکتوم کی ہدایات کے بعد محمد بن راشد المکتوم گلوبل انیشی ایٹوز (ایم بی آر جی آئی) نے اعلان کیا ہے کہ اس نے غزہ میں براہ راست غذائی امداد کے لیے11.7 ملین ڈالر کا عطیہ دیا ہے۔

یہ اقوام متحدہ کے ورلڈ فوڈ پروگرام کے تعاون سے ہے، جس سے مجموعی مالی امداد 230 ملین درہم تک پہنچ جاتی ہے۔

یہ امداد اقوام متحدہ کے ورلڈ فوڈ پروگرام (ڈبلیو ایف پی) کے تعاون سے ہے، جس سے 2021 میں تعاون کے آغاز سے اب تک ایم بی آر جی آئی کی جانب سے ڈبلیو ایف پی کو دی جانے والی مجموعی مالی امداد 230 ملین درہم (62.6 ملین ڈالر سے زائد) تک پہنچ گئی ہے۔

یہ اعلان ایسے وقت میں کیا گیا ہے جب ایم بی آر جی آئی نے ڈبلیو ایف پی کی ایگزیکٹو ڈائریکٹر سنڈی میک کین کی موجودگی میں ڈبلیو ایف پی کے ساتھ ایک معاہدے پر دستخط کیے ہیں، جو 15 سے 19 جنوری کے درمیان سوئٹزرلینڈ کے شہر ڈیووس میں منعقد ہونے والے ورلڈ اکنامک فورم (ڈبلیو ای ایف) کے موقع پر منعقد ہوا۔

معاہدے کے مطابق ایم بی آر جی آئی ڈبلیو ایف پی کو براہ راست غذائی امداد فراہم کرے گا جس سے غزہ میں دس لاکھ سے زائد افراد مستفید ہوں گے۔