لاہور: پنجاب میں ضابطہ اخلاق کی خلاف ورزی پر ڈسٹرکٹ مانیٹرنگ افسران نے کارروائیاں تیز کردیں۔

صوبہ پنجاب میں انتخابی مہم کی مانیٹرنگ کے لیے الیکشن کمیشن کی مانیٹرنگ ٹیمیں فعال کردی گئی ہیں جب کہ ضابطہ اخلاق کی خلاف ورزی پر ڈسٹرکٹ مانیٹرنگ افسران نے سخت کارروائیاں کیں۔

دفتر صوبائی الیکشن کمشنر پنجاب کے مطابق این اے 153 ملتان میں امیدوار حامد علی بھٹی کو ضابطہ اخلاق کی خلاف ورزی پر نوٹس جاری کردیا جب کہ این اے 66 وزیرآباد میں امیدوار احمد چٹھہ کو بھی نوٹس جاری کیا گیا ہے۔

دفتر صوبائی الیکشن کمشنر پنجاب کا کہنا ہے کہ پی پی 133 ننکانہ صاحب میں امیدوار نوشیر مان کو وال چاکنگ کرنے پر نوٹس جاری کیا، این اے 75 نارووال سے امیدوار دانیال عزیز کو بھی دیواروں پر پوسٹر آویزاں کرنے پر نوٹس جاری کیا۔

انہوں نے بتایا کہ ننکانہ صاحب میں انتخابی امیدواران کو پینا فلیکس اور بل بورڈز آویزاں کرنے پر وارننگ جاری کی گئی ہیں۔ جہلم، راولپنڈی، اسلام آباد، سرگودھا اور بھکر سے پینا فلیکس اور دیگر تشہیری مواد ہٹا دیا گیا ہے۔

علاوہ ازیں چینوٹ، فیصل آباد، ننکانہ، قصور، لاہور اور ملتان سے بھی پینا فلیکس ہورڈنگز اتروادیے ہیں۔

صوبائی الیکشن کمشنر پنجاب اعجاز انور چوہان نے ڈسٹرکٹ مانیٹرنگ افسران کو سخت ہدایات جاری کرتے ہوئے کہا کہ ضابطہ اخلاق پر عملدرآمد کو ہر صورت یقینی بنایا جائے۔