اقوام متحدہ کی سلامتی کونسل میں امریکہ کا غزہ کی قرارداد کو ناکام بنانے پر چین کا ردعمل سامنے آگیا۔

غیر ملکی خبر رساں ادارے کے مطابق اقوام متحدہ میں چین کے ایلچی ژانگ جون کا کہنا ہے کہ امریکہ کی جانب سے غزہ میں جنگ بندی کی قرارداد کو ویٹو کرنا فلسطینیوں کو مارنے کا لائسنس ہے۔

ژانگ جون نے کہا ’’چین امریکہ کے ویٹو پر عدم اطمینان اور شدید مایوسی کا اظہار کرتا ہے، جنگ بندی کو مسلسل ویٹو کرنے کا مقصد غزہ میں قتل و غارت جاری رکھنا ہے‘‘۔

یاد رہے کہ غزہ میں جنگ بندی کی قراداد کو امریکہ نے تیسری بار ویٹو کیا ہے جب کہ سلامتی کونسل کے پندرہ مستقل ارکان میں سے تیرہ ارکان نے قرارداد کے حق میں ووٹ دیے اور برطانیہ غیر حاضر رہا۔

خیال رہے کہ غزہ میں اسرائیل کے رہائشی علاقوں اور اسپتالوں پر حملے جاری ہیں، گذشتہ 24 گھنٹوں میں 103 فلسطینی شہید جب کہ 142 زخمی ہوگئے۔

غزہ میں جاری اسرائیلی جارحیت کے نتیجے میں اب تک شہید فلسطینیوں کی تعداد 29 ہزار 195 تک پہنچ گئی ہے جب کہ 69 ہزار 170 فلسطینی زخمی ہیں۔