وزیراعظم شہباز شریف کی ایڈوائس پر صدر مملکت نے مشترکہ مفادات کونسل (سی سی آئی) کی تشکیل نو کر دی۔

وزیراعظم شہباز شریف نے مشترکہ مفادات کونسل (سی سی آئی) کی تشکیل نو کر دی ، وزیر خارجہ اسحاق ڈار کو کونسل میں شامل کر لیا گیا ہے جبکہ وزیر خزانہ محمد اورگزیب کو کمیٹی سے باہر رکھا گیا ہے۔

مشترکہ مفادات کونسل کی تشکیل نو کے لیے 25 مارچ کی تاریخ سے ایک نوٹیفکیشن جاری کیا گیا ہے، آٹھ رکنی کونسل کے چیئرمین وزیراعظم ہوں گے۔

بلوچستان، خیبر پختونخواہ، پنجاب اور سندھ کے وزرائے اعلی اراکین ہوں گے جبکہ کونسل میں وزیر خارجہ اسحاق ڈار، وزیر دفاع خواجہ آصف اور وزیر سیفران امیر مقام کو بھی شامل کیا گیا ہے۔

نو تشکیل شدہ کونسل نگران دور کی مشترکہ مفادات کونسل کی جگہ لے گی جس میں وزیر خزانہ شمشاد اختر، وزیر قانون عرفان اسلم اور فواد حسن فواد شامل تھے۔

واضح رہے اس سے قبل اقتصادی رابطہ کمیٹی یا ای سی سی کے معاملے پر بھی کچھ ایسی صورتحال دیکھنے میں ائی تھی جب شروع میں وزیراعظم نے ای سی سی کی سربراہی خود سنبھال لی تاہم بعد میں فیصلہ تبدیل کیا گیا اور وزیر خزانہ محمد اورگزیب کو ای سی سی کا سربراہ بنایا گیا تھا۔