امریکہ کے ٹام لینٹوس کمیشن کا کہنا ہے کہ بھارت میں اقلیتوں کو دوسرے درجے کا شہری سمجھا جاتا ہے۔

بین الاقوامی خبررساں ادارے کے مطابق بھارت میں انسانی حقوق کی تشویشناک صورتحال پرامریکی کانگریس کمیشن کا اجلاس ہوا۔

ٹام لینٹوس کمیشن نے بھارت کوخصوصی تشویش کا ملک قرار دینے کی بھرپور سفارش کی ہے۔

امریکی کمیشن کے ماہرین کی تیار کردہ رپورٹ میں بتایا گیا کہ بھارت میں مسلمانوں کو تشدد کا نشانہ بنایا جاتا ہے۔ بھارت میں اقلیتوں کے خلاف قوانین کاغلط استعمال کیا جاتا ہے اور انہیں دوسرے درجے کا شہری سمجھا جاتا ہے۔

رپورٹ میں بتایا گیا کہ ستمبر میں بھارتی اہلکاروں نے ہردیپ سنگھ نجار کو کینیڈا میں قتل کیا۔نومبرمیں سکھ رہنما گروپتونت سنگھ پنوں کو امریکہ میں قتل کی کوشش کی گئی۔

ایمنسٹی انٹرنیشنل،ہیومن رائٹس واچ،یوایس کمیشن مذہبی آزادی اور انسانی حقوق کی دیگرتنظیموں کے نمائندگان نے بھی امریکی کمیشن میں رپورٹس پیش کیں۔

رپورٹس کے مطابق  بھارت میں  انسانی حقوق  کی سنگین پامالی، مذہبی عدم برداشت ہے۔ بھارت میں اقلیتوں پرظلم وجبر، میڈیا و انٹرنیٹ پر پابندی ہے۔

اجلاس میں بھارت میں جنسی تجارت، انسانی حقوق سے متعلقہ دیگر خلاف ورزیوں پر بریفنگ دی گئی۔ امریکی اسٹیٹ ڈیپارٹمنٹ کی 2022 کی رپورٹ کا بھی امریکی کمیشن میں ذکر کیا گیا۔

چیئرمین ٹام لینٹوس کمیشن جیمز پیٹرک نے کہا کہ انسانی حقو ق رپورٹ  میں بھارت میں مذہبی پابندیوں کا ذکر ہے۔ رپورٹ میں اقلیتوں کے خلاف تشدد،کرپشن و دیگر مسائل کی نشاندہی کی ہے۔

رکن کانگریس جم میک گورن نے کہا کہ 2023 کی رپورٹ میں بھارت میں جبری مشقت  کے خلاف کام کو ناکافی قرار دیا گیا۔ مسائل کی وجہ مودی کی بھارت کو ہندو ریاست بنانے کی کوشش ہے۔

جم میک گورن نے مزید کہا کہ انسانی حقوق کے مسائل کا حل نہ کیا گیا تو بھارت کا مستقبل خطرے میں پڑ جائے گا۔ کانگریس بھارت پر زور دے کہ دہشتگردی سے متعلق قوانین کا ازسر نو جائزہ لے، ایسے قوانین عالمی معاہدوں سے متعلق بھارت کی ذمہ داریوں سے متصادم ہیں۔

کرسٹوفر اسمتھ نے کہا کہ مذہبی آزادی کی رپورٹ کے مطابق 13 بھارتی ریاستوں میں مذہب تبدیلی پر پابندی ہے۔ قانون نافذ کرنے والے اداروں کی جانب سے اقلیتوں کے خلاف تشدد کو اجاگر کیا گیا۔

انہوں نے مزید کہا کہ  بھارت میں مسلمان اور عیسائی کمیونٹی  سب سے زیادہ متاثر ہو رہے ہیں۔ مذہبی آزادی  کے امریکی قانون کے تحت مودی  کو ویزہ دینے سے انکار کیا گیا تھا۔

کرسٹوفر اسمتھ نے کہا کہ انسانی تجارت سے متعلق بھارت کی درجہ بندی کم تر کرنے کی ضرورت ہے۔بھارت میں جبری مشقت اور جنسی تجارت کا مسئلہ انتہائی سنگین ہے۔