غزہ میں امداد حاصل کرنے کے لیے جمع ہونے والے فسطینی خواتین اور بچوں پر اسرائیلی فوج  نے اندھا دھند فائرنگ  کردی جس میں 100 سے زائد افراد شہید اور 700 سے زائد زخمی ہوگئے۔

بین الاقوامی خبر رساں ادارے کے مطابق فلسطین کی وزارت صحت نے تصدیق کی ہے کہ اسرائیلی فوج نے شمالی غزہ میں امدادی سامان کے انتظار میں کھڑے فلسطینیوں پر فائرنگ کی۔

فلسطینی وزارت صحت کے ترجمان اشرف القدرہ نے بتایا کہ اسرائیلی فوج کی فائرنگ سے 104 فلسطینی شہید اور 760 زخمی ہوگئے۔

زخمیوں میں سے اکثریت کی حالت نازک ہونے کے سبب ہلاکتوں میں اضافے کا خدشہ ظاہر کیا جا رہا ہے۔

مقامی میڈیا نے بھی تصدیق کی ہے کہ امداد لینے کے لیے ٹرک کا گھیراؤ کرنے والے فلسطینیوں کو قریب آنے پر اسرائیلی فوجیوں نے براہ راست گولیاں ماریں۔

دوسری جانب اسرائیلی فوج نے  امدادی سامان کے منتظر فلسطینیوں پر فائرنگ اور ہلاکتوں کی تردید  کرتے ہوئے کہا ہے کہ  امدادی سامان سے لدے ٹرک جیسے ہی غزہ میں داخل ہوئے۔ امداد کے لیے منتظر شہری ٹوٹ پڑے اور اس دھکم پیل میں درجنوں افراد زخمی ہوگئے۔

واضح رہے کہ غزہ پر  7 اکتوبر سے جاری اسرائیلی بمباری میں شہید ہونے والے فلسطینیوں کی تعداد 30 ہزار سے تجاوز کرگئی  ہے جب کہ 70 ہزار سے زائد زخمی ہیں۔

 شہید اور زخمی ہونے والوں میں نصف تعداد خواتین اور بچوں کی ہے۔