وزیراعظم شہبازشریف کو امریکی صدر جوبائیڈن کا پہلا خط موصول ہوا ہے جس میں نو منتخب حکومت کے لئے نیک تمناؤں کا اظہار کیا گیا ہے۔

وزیراعظم شہباز شریف کے منصب سنبھالنے کے بعد امریکی صدر کا یہ پہلا خط موصول ہوا ہے جس میں امریکی صدر نے نومنتخب حکومت کے لئے نیک تمناؤں کا اظہار کیا ہے۔

امریکی صدر نے خط میں لکھا کہ دونوں ممالک کے عوام کے درمیان شراکت داری دنیا اور ہماری عوام کی سلامتی یقینی بنانے میں نہایت اہم ہے، دنیا اور خطے کو درپیش وقت کے اہم ترین چیلنجز کا سامنا کرنے میں امریکہ پاکستان کے ساتھ کھڑا رہے گا۔

امریکی صدر نے خط میں کہا کہ صحت عامہ کا تحفظ، معاشی ترقی اور سب کے لئے تعلیم مشترکہ وژن ہے جسے مل کر فروغ دیتے رہیں گے۔ امریکہ پاکستان گرین الائنس فریم ورک سے ماحولیاتی بہتری کے لئے ہم اپنے اتحاد کو مزید مضبوط کریں گے۔

امریکی صدر نے خط میں یہ بھی لکھا کہ پائیدار زرعی ترقی، آبی انتظام اور 2022 کے سیلاب کے تباہ کن اثرات سے بحالی میں پاکستان کی معاونت جاری رکھیں گے جب کہ پاکستان کے ساتھ مل کرانسانی حقوق کے تحفظ اور ترقی کے فروغ کے لئے پرعزم ہیں۔

امریکی صدر نے خط میں مزید لکھا کہ دونوں اقوام کے درمیان استوارمضبوط پارٹنرشپ کو تقویت دیں گے، دونوں ممالک کے عوام کے درمیان استوار قریبی رشتے مزید مضبوط بنائیں گے۔