مریم نواز شریف نے کہا ہے کہ ملکی ذخائر کو کوڑیوں کے بھاؤ فروخت نہیں ہونے دیں گے۔

وزیر اعلیٰ پنجاب مریم نواز شریف کی زیر صدارت مائنز اینڈ منرلز ڈیپارٹمنٹ کے منصوبوں کا جائزہ اجلاس ہوا جس میں پنک راک سالٹ کی خام حالت میں  برآمد پر پابندی کی تجویز پر اتفاق ہوا۔

اجلاس میں مائنز اینڈ منرل لیبر کی فلاح و بہبود کے منصوبوں کیلئے 25 کروڑ روپے کے فنڈز کی منظوری دی گئی جبکہ گزشتہ دور حکومت کے دوران پنک راک سالٹ کی غیر قانونی طور پر الاٹمنٹ پر کیس نیب میں بھیجنے کا فیصلہ بھی کیا گیا۔

اجلاس کی صدارت کرتے ہوئے وزیر اعلیٰ پنجاب مریم نواز شریف نے پنک سالٹ کی ویلیو ایڈڈ پراڈکس پر جامع پلان مرتب کرنے کی ہدایت کی اور کہا کہ محکمہ معدنیات میں کرپشن پر قابو پانے کیلئے جدید ٹیکنالوجی کا استعمال کیا جائے۔

انہوں نے کہا کہ معدنیات کی نیلامی میں انٹرنیشنل سرمایہ کاروں کو بھی مدعو کیا جائے، ملکی ذخائر کو کوڑیوں کے بھاؤ فروخت نہیں ہونے دیں گے صرف اوپن آکشن کے ذریعے نیلامی ہونگی۔

مریم نواز شریف نے یہ بھی کہا کہ غیر ملکی سرمایہ کاروں کے لئے مواقع پیدا کریں گے اور فارن ڈائریکٹ انویسٹمنٹ صوبہ میں لائیں گے جبکہ مائنز اور منرلز ڈیپارٹمنٹ کی 18 ڈویلپمنٹ سکیموں کیلئے فنڈز فوری فراہم کئے جائیں گے۔

ان کا کہنا تھا کہ  کان میں کام کرنے والے مزدوروں کی حفاظت کے قوانین پر محکمہ عملدرآمد یقینی بنائے جبکہ معدنیات کی نیلامی میں انٹرنیشنل سرمایہ کاروں کو مدعو کیا جائے۔

وزیر اعلیٰ پنجاب مریم نواز شریف نے مزید کہا کہ ملکی ذخائر کو کوڑیوں کے بھاؤ فروخت نہیں ہونے دیں گے، اوپن آکشن کے ذریعے نیلامی ہونگی، غیرملکی سرمایہ کاروں کے لیے مواقع پیدا کریں گے۔

اجلاس میں سینئر صوبائی وزیر مریم اورنگزیب، پرویز رشیدصوبائی وزیر اطلاعات عظمیٰ زاہد بخاری، وزیر معدنیات شیر علی گورچانی، سیکرٹری معدنیات، چیف سیکرٹری اور دیگر حکام نے شرکت کی۔