محسن نقوی نے کہا ہے کہ دہشتگردی کےخلاف جنگ پاکستان کی بقاء کی جنگ ہے۔
وفاقی وزیرداخلہ محسن نقوی کی پشاور میں وزیر اعلیٰ ہاؤس آمد ہوئی، خیبرپختونخوا کے وزیر اعلیٰ علی امین گنڈاپور نے وفاقی وزیرداخلہ محسن نقوی کا خیبر مقدم کیا۔
وفاقی وزیرداخلہ محسن نقوی کی وزیر اعلیٰ خیبرپختونخوا علی امین گنڈاپور سے ہونے والی ملاقات میں امن و امان اور سکیورٹی صورتحال پر تبادلہ خیال ہوا۔
وفاقی وزیرداخلہ محسن نقوی اور وزیر اعلیٰ خیبرپختونخوا نے دہشتگردی کے ناسور کے مکمل خاتمے کے عزم کا اعادہ کیا جبکہ دہشتگردوں کے خلاف انٹیلیجنس بیسڈ آپریشن مزید تیز کرنے کا فیصلہ کیا۔
محسن نقوی اور علی امین گنڈاپور نے خود کش حملے میں چینی شہریوں کی ہلاکت پر افسوس کا اظہار کیا جبکہ چینی حکومت ،عوام اور مرنے والے چینی شہریوں کے خاندانوں سے مکمل یکجہتی کا اظہار بھی کیا۔
وفاقی وزیرداخلہ محسن نقوی نے کہا کہ چینی شہریوں پر حملے کے عناصر قرار واقعی سزا سے نہیں بچ سکیں گے جبکہ ملک دشمن عناصر بزدلانہ کارروائیوں سے پاکستانی قوم کے عزم کو شکست نہیں دے سکتے۔
محسن نقوی نے مزید کہا کہ دہشتگردی کےخلاف جنگ پاکستان کی بقاء کی جنگ ہے، پوری طاقت سے ملک دشمنوں کو جواب دیں گے جبکہ خیبرپختونخوا کے ساتھ ہر ممکن تعاون کریں گے۔
اس موقع پر وزیر اعلیٰ خیبرپختونخوا علی امین گنڈاپور نے کہا کہ امن و امان موجودہ صوبائی حکومت کی ترجیحات میں سرفہرست ہے، اس مقصد کے لئے صوبائی حکومت تمام دستیاب وسائل بروئے کار لائے گی۔
علی امین گنڈاپور نے مزید کہا کہ خیبر پختونخوا دہشت گردی سے سب سے ذیادہ متاثر ہوا ہے، صوبے کے عوام کے جان و مال کے تحفظ کو یقینی بنانے کے لئے ہر ممکن اقدامات اُٹھائے جائیں گے۔
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News