پاکستان انٹرنیشنل ایئرلائن (پی آئی اے) کی لاہور سے ٹورنٹو کی پرواز پر تعینات خاتون فضائی میزبان کو ٹورنٹو ائیرپورٹ پر حراست میں لے لیا گیا۔

ذرائع کے مطابق پی کے 789 پر تعینات حنا ثانی نامی ائیر ہوسٹس سے مبینہ طور پر غیر متعلقہ پاسپورٹ برآمد ہوئے جس کے بعد انھیں گرفتار کرلیا گیا۔

ٹورنٹو ایئرپورٹ سے جس خاتون ایئرہوسٹس کو حراست میں لیا گیا وہ ایک معروف پاکستانی گلوکارہ کی رشتہ دار ہیں اور خود بھی سوشل میڈیا پر کافی ایکٹو ہیں۔

خیال رہے کہ اپنے پاسپورٹ کے علاوہ دیگر افراد کے پاسپورٹس کے ساتھ سفر کرنا بین الاقوامی جرم ہے۔

ذرائع کا کہنا ہے کہ مذکورہ ائیر ہوسٹس کو پہلے بھی ممنوعہ اشیاء کینیڈا لانے پر وارننگ دی گئی تھی۔

ذرائع کے مطابق پرواز 789 پر حنا ثانی کے ہمراہ 7 اور فضائی میزبانوں کو بھیجا گیا جن کو ٹورنٹو کے لیے ائیر لائن نے نو فلائی ڈکلیئر کیا ہوا تھا۔ اس عملے کی خصوصی اجازت ڈی جی ایم فلائیٹ سروسز نے اپنی آئی ڈی سے دی۔

دوسری جانب پرواز پر تعینات دیگر دو ائیر ہوسٹسز سے پوچھ گچھ کے بعد کینیڈین حکام نے انھیں ہوٹل جانے کی اجازت دے دی۔

واقعے سے متعلق متعلق پی آئی اے کے ترجمان نے کہا کہ واقعے کے بارے میں آگاہ ہیں اور کینیڈین حکام سے رابطے میں ہیں۔