سابق بھارتی آل راؤنڈر یوراج سنگھ نے آئی سی سی ٹی ٹوئنٹی  ورلڈ کپ کی سیمی فائنلسٹ ٹیموں کی پیش گوئی کردی۔

انٹرنیشنل کرکٹ کونسل (آئی سی سی) ٹی ٹوئنٹی ورلڈ کپ رواں سال جون میں امریکا اور ویسٹ انڈیز میں کھیلا جائے گا۔

آئی سی سی نے بھارت کے سابق اسٹار آل راؤنڈر یوراج سنگھ کو ورلڈکپ کے لیے ایمبیسڈر نامزد کیا ہے۔

خیال رہے کہ یوراج سنگھ نہ صرف 2007 میں ٹی ٹوئنٹی ورلڈکپ جیتنے والی بھارتی ٹیم میں شامل تھے بلکہ وہ 2011 میں ون ڈے ورلڈکپ کی فاتح بھارتی ٹیم کے اسکواڈ کا بھی حصہ تھے۔

انسٹاگرام پر سابق بھارتی آل راؤنڈر سے سوال پوچھا گیا کہ ان کے خیال میں رواں سال ہونے والے ٹی ٹوئنٹی ورلڈکپ میں کون سی چار ٹیمیں سیمی فائنل تک رسائی حاصل کرسکتی ہیں۔

جس  پر یوراج سنگھ نے جواب دیا کہ بھارت، آسٹریلیا، انگلینڈ اور پاکستان ٹی 20 ورلڈ کپ 2024 کے سیمی فائنل میں پہنچ جائیں گے۔

یہ بات قابل ذکر ہے کہ ٹی ٹوئنٹی ورلڈ کپ 2024 میں 20 کوالیفائنگ ٹیموں کو پانچ، پانچ کے چار گروپس میں تقسیم کیا گیا ہے جس میں سے ہر گروپ کی دو ٹاپ ٹیمیں سپر ایٹ راؤنڈ میں جگہ بنائیں گی۔

سپر ایٹ راونڈ میں ٹیموں کو ایک بار پھر چار، چار کے دو گروپس میں تقسیم کیا جائے گا جہاں سے دو، دو ٹاپ ٹیمیں سیمی فائنل میں جگہ بنائیں گی اور پھر فاتح ٹیمیں 29 جون کو فائنل کھیلیں گی۔

میگا ایونٹ کے دوران پاکستان اور بھارت کا مقابلہ 9 جون کو نیویارک میں ہوگا، دونوں ٹیمیں گروپ اے میں شامل ہیں۔