مریم نواز نے کہا ہے کہ دہشتگردی میں ملوث افراد کسی رعایت کے مستحق نہیں۔

وزیر اعلیٰ پنجاب مریم نواز شریف نے شانگلہ حملے میں ملوث افراد کی گرفتاری پر سیکورٹی فورسز کو خراج تحسین پیش کیا ہے۔

مریم نواز نے کہا کہ دہشتگردی میں ملوث افراد کسی رعایت کے مستحق نہیں، دہشتگردوں اور ان کے سہولت کاروں کو کیفرِ کردار تک پہنچانا ناگزیر ہے۔

 وزیراعلیٰ پنجاب مریم نواز شریف نے مزید کہا کہ پاکستانی قوم دہشتگردی کے خاتمے کے عزم پر یکسو ہے۔

شانگلہ خودکش حملے میں ملوث 10 سے زائد دہشتگرد اور سہولت کار گرفتار

سی ٹی ڈی نے شانگلہ خودکش حملے میں ملوث 10سے زائد دہشت گرد اور سہولت کار گرفتار کرلیے۔

سی ٹی ڈی ذرائع کے مطابق حملے میں ملوث اہم کمانڈر اور دہشت گرد  نیٹ ورک بے نقاب ہوگیا، حملے میں ملوث نیٹ ورک کا  تعلق کالعدم تنظیم ٹی ٹی پی سے ہے جب کہ خودکش حملہ آور کا تعلق افغانستان سے ہے۔

سی ٹی ڈی ذرائع کے مطابق خودکش حملہ آور کو افغانستان سے لانے والا  کمانڈر بھی گرفتار کیا گیا ہے،گرفتار  افراد میں 4 سہولت کار شامل ہیں۔