وہ آیا، اس نے دیکھا اور فتح کر لیا، پاکستانی ہیرا سونے کا میڈل گھر لے آیا، ارشد ندیم قوم کے ہیرو آپ کو قوم کا سلام۔

قومی جیولین تھرور ارشد ندیم نے 40 سال بعد پاکستان کو اولمپکس میں گولڈ جتوایا۔

ارشد ندیم کی پیرس اولمپکس میں تاریخی کامیابی پر انعامات کی بارش، پنجاب حکومت کا ارشد ندیم کے لیے 10 کروڑ روپے انعام کا اعلان کیا گیا ہے۔

وزیر اعلیٰ پنجاب مریم نواز کا کہنا ہے کہ جشن آزادی پر ارشد ندیم نے گولڈ میڈل جیت کر قوم کو تحفہ دیا ہے، وزیر اعلیٰ نے میاں چنوں میں اسپورٹس سٹی بنانے کا بھی اعلان کیا۔

گورنر پنجاب سردارسلیم حیدر خان کی جانب سے قومی ہیرو کے لیے 20 لاکھ روپے دینے کا اعلان کیا گیا جبکہ ارشد ندیم کو گورنر ہاؤس پنجاب کا مہمان بننے کی بھی پیشکش کی گئی ہے۔

سندھ حکومت کا بھی فخر پاکستان کے لیے 5 کروڑ انعامی رقم کا اعلان کیا گیا ہے، گورنر سندھ نے بھی انعامی رقم کا اعلان کیا۔

وزیراعظم شہباز شریف نے بھی جیولین تھرور ارشد ندیم کا مقابلہ دیکھا۔

ارشد ندیم کی والدہ بیٹے کی تاریخی کامیابی پر خوش، والدہ کا کہنا تھا کہ جیت کی خوب دعا کی تھی، میرے بیٹے نے ملک وقوم کا نام روشن کیا۔

عوام نے ارشد ندیم کی جیت کو یوم آزادی کا تحفہ قرار دے دیا۔

پاکستان کا ایک گولڈ میڈل بھارت پر بھاری پڑا، بھارتی ایتھلیٹس کے 1 چاندی اور 4 کانسی کے ساتھ 5 میڈلز کے باوجود 63 ویں پوزیشن پر ہے جبکہ ارشد ندیم کے ایک گولڈ میڈل کی بدولت پاکستان 53 ویں نمبر پر آ گیا۔  ارشد ندیم کے میڈلز کی تعداد 10 ہوگئی میڈلز میں 5 گولڈ میڈلز بھی شامل ہیں۔

ارشد ندیم نے92.97 میٹر کی تھرو کر کے گولڈ میڈل جیتا، ارشد ندیم نے اولمپکس کا ریکارڈ بھی بنا دیا جبکہ دفاعی چیمپئن بھارتی حریف نیرج چوپڑا سلور میڈل لے سکے۔