واشنگٹن: امریکی صدر ڈونلڈ ٹرمپ نے کہا ہے کہ امریکا مشرقِ وسطیٰ میں تین ہزار سال پرانے تنازع کو حل کرنے جا رہا ہے۔

وائٹ ہاؤس میں میڈیا سے گفتگو کرتے ہوئے صدر ٹرمپ کہا کہ غزہ امن ڈیل کو دنیا بھر کے ممالک نے سراہا ہے۔ ان کا کہنا تھا کہ امریکا مشرقِ وسطیٰ میں تین ہزار سال پرانے تنازع کو حل کرنے جا رہا ہے۔

انہوں نے بتایا کہ حماس کے ساتھ جنگ بندی اور یرغمالیوں کی رہائی کے حوالے سے مذاکرات جاری ہیں، جبکہ ترکیہ، متحدہ عرب امارات اور سعودی عرب بھی امن کے قیام کے لیے سرگرم ہیں۔

صدر ٹرمپ نے کہا کہ حماس ترکیہ کے صدر رجب طیب اردوان کا احترام کرتی ہے، اور اردوان غزہ میں امن کے لیے اپنا اثر و رسوخ استعمال کر رہے ہیں۔ ان کے مطابق اسرائیلی عوام بھی یرغمالیوں کی واپسی اور تنازع کے خاتمے کے خواہاں ہیں۔

داخلی امور پر بات کرتے ہوئے امریکی صدر نے کہا کہ وفاقی حکومت کا شٹ ڈاؤن ڈیموکریٹس کی وجہ سے ہے، جو غیر قانونی تارکین وطن کو صحت کی سہولت دینا چاہتے ہیں۔ انہوں نے الزام لگایا کہ اوباما دور میں اربوں ڈالر کی سبسڈیز دے کر معیشت کو نقصان پہنچایا گیا۔

صدر ٹرمپ نے مزید کہا کہ شکاگو بدامنی کا شکار ہو کر “وار زون” بن چکا ہے، جبکہ فوج کی تعیناتی کے بعد واشنگٹن ڈی سی ایک پرامن شہر بن گیا ہے۔

انہوں نے اقوامِ متحدہ میں اپنے خطاب کے حوالے سے کہا کہ اُس دوران ٹیلی پرامپٹر خراب تھا اور سامعین کو آواز سننے میں دشواری پیش آئی۔ میں نے میلانیہ سے پوچھا تو انہوں نے بتایا کہ ہیڈفون میں آواز بالکل نہیں آرہی تھی۔