35ویں نیشنل گیمز کو ری شیڈول کر دیا گیا ہے اور اب یہ اہم قومی ایونٹ 6 سے 13 دسمبر 2025 تک کراچی میں منعقد ہوگا۔

پاکستان اولمپک ایسوسی ایشن (POA) نے نیشنل گیمز کے آپریشنل روڈ میپ کو حتمی شکل دے دی ہے۔

پاکستان اولمپک ایسوسی ایشن کے صدر عارف سعید نے وزیر اعلیٰ سندھ سید مراد علی شاہ سے ملاقات کی اور نیشنل گیمز کے انعقاد سے متعلق تفصیلی بریفنگ دی۔ اس موقع پر انہوں نے سندھ حکومت کی میزبانی اور تعاون پر اظہارِ تشکر بھی کیا۔

عارف سعید کا کہنا تھا کہ نیشنل گیمز کا انعقاد نہ صرف نوجوانوں کو صحت مند سرگرمیوں کی طرف راغب کرے گا بلکہ ملک میں کھیلوں کے فروغ کے لیے بھی ایک اہم سنگِ میل ثابت ہوگا۔

 انہوں نے مزید کہا کہ کراچی کو نیشنل گیمز کی میزبانی سونپنا اس کے اسپورٹس انفرا اسٹرکچر اور صلاحیتوں کا اعتراف ہے۔

ذرائع کے مطابق، نیشنل گیمز کے دوران مختلف کھیلوں میں ہزاروں ایتھلیٹس، کوچز اور آفیشلز شرکت کریں گے، جبکہ سیکیورٹی، ٹرانسپورٹ اور رہائش سمیت تمام انتظامات کے لیے بین الصوبائی تعاون حاصل کیا جائے گا۔

سندھ حکومت نے نیشنل گیمز کے کامیاب انعقاد کے لیے ہر ممکن تعاون کی یقین دہانی کرائی ہے۔

متوقع ہے کہ نیشنل گیمز کے ذریعے نہ صرف مقامی کھلاڑیوں کو اپنی صلاحیتوں کے اظہار کا موقع ملے گا بلکہ کھیلوں کے میدان میں پاکستان کا مثبت امیج بھی دنیا کے سامنے آئے گا۔