موسمی تبدیلیاں ایشیا کو شدید متاثر کرنے لگیں، خطے کے تین ممالک میں تباہ کن سیلاب نے 391 سے زائد زندگیوں کے چراغ گل کردیئے۔

عالمی ذرائع ابلاغ کے مطابق تھائی لینڈ، انڈونیشیا اور سری لنکا میں رواں سال شدید بارشوں نے تمام ریکارڈ توڑ دیئے ہیں، تینوں ممالک میں سیلاب اور لینڈ سلائیڈنگ سے بڑے پیمانے پر تباہی ہوئی ہے۔

خبر ایجنسی کے مطابق متاثرہ علاقوں میں انفراسٹرکچر تباہ ہوچکے ہیں، جبکہ سیکڑوں خاندان عارضی پناہ گاہوں میں پناہ لینے پر مجبور ہیں۔

انڈونیشیا کے جزیرہ سماٹرا میں میں سب سے زیادہ 174 ہلاکتیں ہوئی ہیں، سماٹرا میں 79 افراد اب بھی لاپتہ ہیں، جبکہ ہزاروں خاندان بے گھر ہو چکے ہیں۔

مزید پڑھیں: جنوبی ایشیا خطرے کی لپیٹ میں، ورلڈ بینک کا ہولناک انتباہ جاری

خبر ایجنسی کے مطابق تھائی لینڈ میں سیلابی صورتحال بگڑ رہی ہے، مرنے والوں کی تعداد 87 ہوگئی ہے، جنوب مشرقی تھائی لینڈ میں مسلسل بارشوں سے بڑے شہر بدستور زیر آب ہیں۔

سری لنکا میں طوفان دتوا کے باعث بارشوں اور لینڈ سلائیڈنگ نے خطرہ بڑھا دیا ہے، سری لنکا میں ہلاکتیں 130 سے تجاوز کرچکی ہیں، جبکہ متعدد علاقوں میں درجنوں افراد تاحال لاپتہ ہیں۔

خبر ایجنسی کے مطابق امدادی ٹیموں کی کوششیں جاری، مسلسل بارشیں تینوں ممالک میں خطرات بڑھا رہی ہیں، متاثرہ علاقوں میں مزید موسم بگڑنے کی پیشگوئی اور الرٹ جاری کر دیئے گئے۔