ایک برطانوی سوشل میڈیا اسٹار کو  مفت کھانا مانگنا مہنگا پڑ گیا۔

تفصیلات کے مطابق  انسٹاگرام پر 50 ہزار فالوورز  رکھنے والے  ایک برطانوی سوشل میڈیا اسٹار کو اس وقت سخت شرمندگی کا سامنا کرنا پڑا جب مفت کھانے کے بدلے ریستوران کی تشہیر کی پیشکش کرنے پر ریستوران انتظامیہ نے انہیں پولیس اسٹیشن کا راستہ دکھا دیا۔

سوشل میڈیا اسٹار  کرسٹوفر جیسی اکثر و بیشتر مختلف کمپنیوں کی تشہیر کرتے رہتے ہیں۔

چند روز قبل انہوں نے فور لیگز نامی ایک ریستوران کو اپنے مطلوبہ کھانے کے بارے میں بتاتے ہوئے پیشکش کی کہ وہ  اگر انہیں مفت کھانا فراہم کریں تو وہ بدلے میں ان کے ریستوران کی تشہیر اپنے سوشل میڈیا پر کریں گے۔

ریستوران نے ان کی پیشکش پر رضا مندی کا اظہار کرتے ہوئے ایک ایڈریس بتایا کہ وہ وہاں سے اپنے پارسل پک کرلیں تاہم جب وہ  مطلوبہ جگہ پہنچے تو ریستوران کی جانب سے انہیں میسج کیا گیا کہ سامنے موجود پولیس اسٹیشن میں چلے جائیں اور خود کو ہاسپٹیلٹی انڈسٹری کے خلاف جرم کا مرتکب قرار دے کر رپورٹ کریں۔

ریستوران انتظامیہ کی جانب سے  کرسٹوفر کے ساتھ ہونے والی گفتگو کے اسکرین شاٹس بھی اپنے سوشل میڈیا اکاؤنٹ پر شیئر کیے گئے۔