پاکستان تحریک انصاف کی کال پرسعودی عرب میں بھی یوم تشکرکی تقریبات منعقد کی گئیں اور حکومت  کا ایک سال مکمل کرنے پر کیک کاٹا گیا۔

تفصیلات کےمطابق پاکستان تحریک انصاف جدہ کےزیراہتمام یوم تشکر کے حوالے سے دو الگ الگ تقریبات منعقد ہوئیں جس میں پہلی تقریب عزیریہ اور دوسری ہمدانیہ میں منعقد ہوئی۔ ایک تقریب کی قیادت جدہ کے سینئر رہنما فرخ رشید نے کی جس میں جدہ کے سابق عہدے داران فرخ رشید الیاس قاضی ،سید راشد علی شاہ ،نذیر چغتائی ، عقیل آرائیں جبکہ دوسری تقریب کی صدارت زاہد محمود اعوان نے کی۔ تقریب سے سینئررہنما اور ویسٹرن ریجن کے سابق عہدے داران عجب خان دشانی ،مرزا ندیم الحق ،اشفاق واحد ،شہباز بھٹی ، ممتاز خان نے خطاب  کیا۔

دونوں تقریبات میں مقررین کا کہنا تھا کے ایک سال پہلے قانون سے بالاتر سمجھنے والے چوروں کو جیل میں ڈال کر نئے پاکستان کا جو وعدہ کیا تھا وہ پورا کر دیاگیاہے، جس پر ہم یوم تشکر منا رہے ہیں۔

مقررین کاکہناتھا کہ وزیراعظم عمران خان نے کرپشن کے خلاف ملک کے عوام کو ایک نئی سوچ دی تھی، وزیراعظم کے دورہ امریکہ سے پاکستان کا وقار پوری دنیا میں بلند ہوا ہے۔

انہوں نے مزید کہاکہ  وزیراعظم کے دورے سے پاکستان، افغانستان، ایران اور سعودی عرب کو فائدہ ہوگا، ہمارے قائد عمران خان نے ملک کی بااثرمافیا کو جیلوں میں ڈال کر پورے ملک کو یہ پیغام دیا ہے کہ چاہے کوئی شخص کتنا بھی بااثر کیوں نہ ہو،کرپشن کرے گا تو جیل میں جائے گا۔