وزیراعظم عمران خان کا کہنا ہے کہ مقبوضہ کشمیر کی صورتحال پر سلامتی کونسل اجلاس کا خیر مقدم کرتا ہوں، 50 سال میں پہلی بار دنیا کے بڑے سفارتی فورم پر مسئلہ کشمیر اٹھایا گیا۔

وزیر اعظم کا کہنا ہے کہ اقوام متحدہ کی 11 قراردادوں میں کشمیریوں کے حق خود ارادیت کا عزم کیا گیا، سیکیورٹی کونسل کا اجلاس اقوام متحدہ کی قراردادوں کی یاد دہانی ہے۔

I welcome the UNSC meeting to discuss the serious situation in Occupied Jammu & Kashmir. It is for the first time in over 50 yrs that the world’s highest diplomatic forum has taken up this issue. There are 11 UNSC resolutions reiterating the Kashmiris right to self determination.

— Imran Khan (@ImranKhanPTI) August 17, 2019

ان کا مزید کہنا ہے کہ کشمیریوں کی تکالیف کا ازالہ کرنا اور تنازعے کا حل عالمی ادارے کی ذمہ داری ہے۔ 

واضح رہے کہ مقبوضہ کشمیر پر اقوام متحدہ کی سلامتی کونسل کا اجلاس گزشتہ روز ہوا تھا جس کے دوران کونسل کو مقبوضہ کشمیر کے موجودہ حالات پر بریفنگ دی گئی تھی۔ سلامتی کونسل اجلاس میں 5 مستقل اور 10 غیر مستقل نمائندے شریک ہوئے تھے۔

سلامتی کونسل کے اجلاس کے بعد چینی مندوب نے میڈیا سے گفتگو کر تے ہوئے کہا کہ مقبوضہ کشمیر کا مسئلہ تاریخی ہے، مسئلہ کشمیر کو اقوام متحدہ کی قراردادوں کے مطابق حل ہونا چاہیئے، بھارتی آئینی ترامیم سے خطے میں تناؤ پیدا ہوگا۔

دوسری جا نب کشمیر سے متعلق وزیراعظم کی جانب سے بنائی گئی خصوصی کمیٹی کا ان کیمرہ اجلاس اسلام آبادمیں جاری ہے، اجلاس میں ڈی جی آئی ایس پی آر بھی شریک ہے۔

ذرائع کے مطابق ان کیمرہ اجلاس کی صدارت وزیرخارجہ شاہ محمود قریشی کررہے ہیں اس کے علاوہ کمیٹی اجلاس میں اٹارنی جنرل، ڈی جی آئی ایس آئی، ڈی جی ملٹری آپریشنز اور ڈی جی آئی ایس پی آر بھی شریک ہیں۔

اس کے علاوہ اجلاس میں آزادکشمیر کے صدر مسعود خان, وزیراعظم راجہ فاروق حیدراور گلگت بلتستان کے گورنر ، چیئرمین پارلیمانی کشمیر کمیٹی سید فخر امام اور امیر جماعت اسلامی سراج الحق بھی شریک ہیں۔

ذرائع کا کہنا ہے کہ اجلاس میں پچاس سال بعد مسئلہ کشمیر پر سلامتی کونسل میں بحث اور آئندہ کے لائحہ عمل پر گفتگوجاری ہے اس کے علاوہ وزیر خارجہ شرکاء کو مقبوضہ کشمیر کی حالیہ صورتحال اور پاکستان کی سفارتی کوششوں و سلامتی کونسل اجلاس پر اعتماد میں لیں گے۔