پاکستان، ترکی اور ملائشیاء کے وزرائے اعظم نے اسلاموفوبیا سے جنم لینے والے چیلنجز سے نمٹنے کے لئے ایک مشترکہ انگریزی چینل لانے کا فیصلہ کیا ہے۔ 

پاکستان کے وزیراعظم عمران خان، ترکی کے صدر طیب  اردگان اور ملائیشیا  کے وزیراعظم مہاتیر محمد نے انگریزی چینل بنانے کا فیصلہ کر لیا ہے، عمران خان نے اس حوالے سے ایک ٹوئٹ میں بھی تفصیلات بتا ئی ہیں۔

President Erdogan, PM Mahatir and myself had a meeting today in which we decided our 3 countries would jointly start an English language channel dedicated to confronting the challenges posed by Islamophobia and setting the record straight on our great religion – Islam.

— Imran Khan (@ImranKhanPTI) September 25, 2019

وزیراعظم پاکستان عمران خان نے سماجی رابطے کی ویب سائٹ ٹوئٹر پر اس حوالے سے اپنے ایک پیغام میں کہا ہے کہ صدر اردگان، وزیراعظم مہاتیر محمد اور میں نے آج ملاقات کی اور فیصلہ کیا کہ ہم تینوں ممالک ملکر ایک ایسا انگریزی چینل شروع کریں گے جو اسلاموفوبیا سے جنم لینے والے چیلنجز کے مقابلے اور ہمارے عظیم مذہب اسلام کے حقیقی تشخص کو اجاگر کرنے کیلئے مختص ہوگا۔

عمران خان نے ٹوئٹ میں مزید لکھا کہ ایسی تمام غلط فہمیاں جو لوگوں کو مسلمانوں کیخلاف یکجا کرتی ہیں، کا ازالہ کیا جائےگا، توہین رسالت کے معاملے کا سیاق و سباق درست کیا جائے گا،  دنیا کی تاریخ، اسلام سے آگہی کیلئے فلمیں بھی تیار کی جائیں گی۔

عمران خان نے لکھا کہ اس مشترکہ چینل کے ذریعے مسلمانوں کو میڈیا پر مکمل نمائندگی ملے گی۔

واضح رہے کہ گزشتہ دن پاکستان، ملائیشیا اور ترکی نے مشترکہ طور پر اقوام متحدہ ہیڈ کوارٹرز میں ’نفرت انگیز تقاریر‘ کی روک تھام کے سلسلے میں ایک اہم کانفرنس کا انعقاد کیا تھا، اس کانفرنس سے خطاب میں وزیر اعظم عمران خان نے کہا کہ مذہب کا دہشت گردی سے کوئی تعلق نہیں ، مسلمانوں کے خلاف نفرت انگیز بیانیے کا ازالہ کیا جانا ضروری ہے۔