اقوام متحدہ کے آفیشل یوٹیوب چینل پر وزیراعظم عمران خان کی تقریر نے مقبولیت کے نئے ریکارڈ قائم کر دیئے ہیں۔

تفصیلات کے مطابق جنرل اسمبلی میں کی گئی عمران خان کی تقریر کی ویڈیو کواقوام متحدہ کے آفیشل یوٹیوب چینل پرفائل کیے جانے تک چار لاکھ 71 ہزار مرتبہ دیکھا جاچکا تھا۔

عمران خان کے مقابلے میں مودی کی تقریر دو زبا نو ں ہندی اور انگریزی میں اپ لوڈ کی گئی جسے صرف 49 اور 95 ہزار مرتبہ ہی دیکھا گیا ہے۔

دوسری جانب ملائیشیا کے وزیراعظم مہاتیر محمد کی تقریر دو لاکھ 27 ہزار، بنگلہ دیش کی وزیراعظم حسینہ شیخ ایک لاکھ 33 ہزار، ترک صدر رجب طیب اردوان کی چار لاکھ 26 ہزار جبکہ امریکی صدر ڈونلڈ ٹرمپ کی 47 ہزار مرتبہ دیکھی گئی ہے اور اس طرح عمران خان سب پر با زی لے گئے۔

اسی طرح صومالیہ کے صدر کی تقریب ایک لاکھ 39 ہزار، برطانوی وزیراعظم بورسن جانسن ایک لاکھ 17 ہزار، قطر کے امیر کی 89 ہزار جبکہ نیوزی لینڈ کی وزیراعظم کی تقریر ایک لاکھ 75 ہزار مرتبہ دیکھی گئی۔

واضح رہے کہ جنرل اسمبلی میں خطاب کے دوران وزیر اعظم عمران خان کو زبردست خراج تحسین پیش کرتے ہوئے 5 بار تالیاں بجائی گئیں جبکہ وزیراعظم کا خطاب ٹوئٹر پر ٹاپ ٹرینڈ بھی بن گیا۔

دوسری جانب وزیراعظم عمران خان کی اقوام متحدہ  کی جنرل اسمبلی میں مسئلہ کشمیر  پرشا ندار تقریر کے بعد مقبوضہ وادی میں کرفیو کے باوجود کچھ کشمیری سڑکوں پر نکل آئے اور بھرپور جشن منایا۔

واضح رہے کہ بھارتی فوج نے مقبوضہ کشمیر میں 5 اگست سے کرفیو نافذ کر رکھا ہے جس کے باعث کشمیری اپنے گھروں میں قید ہو کر رہ گئے ہیں، 56 روز سے انٹرنیٹ موبائل سروس اور کاروبارمکمل طور پر بند ہیں جبکہ ہزاروں نوجوانوں کو گرفتار کیا جاچکا ہے۔