وزیراعظم عمران خان نے وزرا کو اراکین اسمبلی کے شکوے شکایات دور کرنے کی ہدایت جاری کرتے ہوئے کہا ہے کہ جن وزرا کی کارکردگی ٹھیک نہیں، انھیں تبدیل کر رہا ہوں۔

تفصیلات کے مطا  بق پشاور سے ایم این اے ارباب عامر اجلاس میں بات کرتے ہوئے آبدیدہ ہو گئے اور وزیراعظم کو بتایا کہ وزرا ہمیں ملاقات کے لیے وقت بھی نہیں دیتے، حلقے کے عوام کے جائز کام کے لیے بھی وزرا کی منتیں کرتے ہیں، پھر بھی کام نہیں ہو رہے۔

ارباب عامر جذباتی ہو کر اجلاس سے اٹھ کر جانے لگے تو وزیراعظم نے روک دیا اور کہا کہ جن وزرا کی کارکردگی ٹھیک نہیں، انہیں تبدیل کر رہا ہوں۔ اس موقع پر وزیراعظم نے وزرا کو اراکین کے شکوے دور کرنے کی ہدایت کی اور کہا کہ ارکان کے تحفظات سننے کے لیے خود ملاقاتیں کروں گا۔

ذرائع کے مطابق اجلاس میں نورعالم خان کی اسمبلی فلور پر حکومت پر تنقید کا تذکرہ بھی ہوا۔ وزیراعظم نے کہا کہ گزشتہ ادوار میں جب لوٹ مار ہو رہی تھی تو نور عالم اس وقت کیوں نہیں بولے؟ نورعالم تمہیں ابھی یاد آیا ہے مہنگائی ہو رہی ہے۔ان کا کہنا تھا کہ نور عالم سمیت سب کو معلوم ہونا چاہیے کہ مہنگائی کی وجہ کیا ہے؟ گزشتہ دور کی معاشی پالیسیوں کی وجہ سے ڈالر کا ریٹ اور مہنگائی بڑھی۔

اس کے علا وہ دوسری جانب وزیراعظم عمران خان سے وزیراعلیٰ پنجاب عثمان بزدار نے بھی ملاقات کی اور پنجاب کی سیاسی صورتحال ، ڈینگی مچھر کے پھیلاؤ اور پولیس اصلاحات ایجنڈے پر تبادلہ خیال کیا ۔

وزیراعلیٰ نے پولیس اصلاحات پر وزیراعظم کو آگاہ کیا،آئی جی پولیس ریفامرز پر وزیراعظم کو بریفنگ دی،وزیراعظم عمران خان نے 30ستمبر تک پولیس اصلاحات نہ کرنے اور ڈینگی مچھر کو پھیلنے سے روکنے کیلئے ہنگامی اقدامات نہ اٹھانے پر برہمی کا اظہار کیا۔

وزیراعظم کی زیر صدارت آج وفاقی کابینہ کا اجلاس

وزیراعظم عمران خان کی زیر صدارت وفاقی کابینہ کا اجلاس آج یکم اکتوبر کو ہوگا، جس میں  وزیراعظم اقوام متحدہ جنرل اسمبلی خطاب سے متعلق کابینہ کو اعتماد میں لیں گے۔

اس کے ساتھ ساتھ وزیراعظم عالمی رہنماؤں سے ملاقاتوں پر بھی کابینہ کو اعتماد میں لیں گے،اجلاس میں مقبوضہ کشمیر کی تازہ صورتحال کا جائزہ لیا جائے گا،وفاقی کابینہ کے اجلاس کا 16 نکاتی ایجنڈا جاری کردیا گیاہے،کابینہ اپنے فیصلوں پر عمل درآمد کا جائزہ لے گی ،عوامی مفاد کے نئے منصوبوں پر غور کریگی، ای سی سی کے فیصلوں اور کابینہ کمیٹی برائے نجکاری کے فیصلوں کی بھی توثیق کریگی ۔