پاکستان سعودی دباؤ میں آکر ملائیشین دارالحکومت میں ہونے والی کوالالمپور اسلامی کانفرنس میں شرکت سے دستبردار ہوگیا ہے۔

ذرائع کے مطابق وزیر اعظم عمران خان  نے ملائشیا کے وزیر اعظم مہاتیر محمد کو ٹیلیفون کر کےکوالالمپور میں  ہونے والی کے ایل سمٹ میں شرکت نہ کرنے کے فیصلے سےآگاہ کیا۔

وزیر اعظم نے معاملے میں غیر جانبدار  رہنے کا فیصلہ کرتے ہوئے مہاتیر محمد کو کانفرنس کے انعقاد پر سعودی تحفظات کے حوالے سے بھی آگاہ کیا۔

اس موقع پر  ڈاکٹر مہاتیر محمد نے  سیاسی سمجھ بوجھ کا مظاہرہ کرتے ہوئے پاکستان کی پوزیشن کو تسلیم کیا اور کہا کہ وہ پاکستان  کی مجبوریاں  سمجھ سکتے ہیں۔

مہاتیر محمد کا مزید کہنا تھا کہ و ہ جلد  خود سعودی عرب جا کر سعودی قیادت کے  تحفظات دور کریں گے۔

ذرائع کا کہنا ہے کہ پاکستان نے اسلامی کانفرنس میں شرکت نہ کرنے کا فیصلہ سعودی عرب کی جانب سے اسلامی کانفرنس پر اعتراض کے بعد کیا۔

کوالالمپور کانفرنس میں  پاکستان سے کسی بھی شخصیت کوملکی  نمائندگی کے لئے نہیں بھیجا جائے گا۔

واضح رہے کہ وزیر اعظم عمران خان اس وقت سوئٹزرلینڈ کے شہر جینوا میں موجود    ہیں جہاں وہ عالمی مہاجرین فورم  کے اجلاس کی مشترکہ صدارت بھی کریں گے۔

اس سے قبل یہ امکان ظاہر  کیا جارہا تھا وزیرخارجہ شاہ محمود قریشی وزیراعظم عمران خان کی جگہ کوالالمپور سمٹ میں شرکت کریں گے۔

یاد رہے کہ گذشتہ روز  وزیراعظم عمران خان کو مہاتیر محمد کی جانب سے ملائیشین پروٹون گاڑی بطور تحفہ  بھیجی گئی ہے۔ جسےعمران خان کو بطور تحفہ دینے کی تقریب ملائیشین ہائی کمیشن میں منعقد ہوئی۔

وزیراعظم کو تحفہ میں دی جانے والی گاڑی کی قیمت 98 ہزار 400 ملائشین رنگٹ (پاکستانی تقریبا 38 لاکھ) ہے۔

اس موقع پر ملائیشین ہائی کمشنر نے کہا کہ یہ گاڑی ایک بھائی کی طرف سے دوسرے بھائی کو تحفہ ہے۔

ملائیشیا کے وزیراعظم مہاتیر محمد نے گاڑی کی پیداوار پاکستان میں شروع کرنے کا بھی اعلان کیا تھا۔ ان کا مزید کہنا تھا کہ پاکستان اورملائیشیا کے مابین مضبوط اور گہرے تعلقات ہیں۔