شہر قائد سمیت صوبے بھر میں پانچ دن کی بندش کے بعد سی این جی اسٹیشن آج صبح  کھل گئے ہیں۔

تفصیلات کے مطابق کراچی سمیت سندھ بھر میں سی این جی اسٹیشن صح 8 بجے سے رات آٹھ بجے تک کے لیے کھول دیئے گئے، شہریوں نے سی این جی حاصل کرنے کے لیے گاڑیوں کی لمبی قطاریں بھی بنالی۔

سندھ میں سی این جی اسٹیشنز اتوار کی صبح کھلیں گے

حکام کی جانب سے سی این جی اسٹیشن پانچ دن کی بندش کے بعد محض 12 گھنٹو ں کے لیے کھولے گئے ہیں۔

ذرائع کے مطابق سی این جی اسٹیشن کھلنے کے انتظار میں رکشہ، بس اور ٹیکسی مالکان رات سے ہی سی این جی اسٹیشنز کے باہر لائن میں کھڑے ہوگئے تھے تاکہ صبح سویرے  ان کا نمبر جلدی آجائے۔

سی این جی کی لائن میں کھڑے افراد کا کہناہے کہ حکام کی جانب سے سی این جی کی بندش کا شیڈول جاری نہ ہونا ہمارے لیے ذہنی اذیت کا باعث ہے۔

ایس ایس جی سی ترجمان کی جانب سے موقف اپنا یا گیا ہے کہ ایس ایس جی سی کومختلف گیس فیلڈز سے ملنے والی گیس کی مقدارکم موصول ہو رہی ہے جس  کے سبب لائن پیک سخت متاثر ہے۔

ترجمان ایس ایس جی سی کا مزید کہنا تھا کہ انتہائی کم پریشر کی وجہ سے کمپنی کو گھریلو صارفین کو گیس پہنچانے میں سخت مشکلات کا سامنا ہے۔

گزشتہ دن ایس ایس جی سی  ترجمان نے اپنے موقف میں کہا کہ سی این جی صارفین کی مشکلات کو سامنے رکھتے ہوئے کل بروز اتوار صبح 8 بجے سے رات 8 بجے تک12گھنٹے  کے لیےسندھ بھر میں تمام سی این جی اسٹیشنز کو گیس کی سپلائی جاری رکھی  جائےگی۔

ترجمان ایس ایس جی سی نے کہا کہ آئندہ  کے شیڈول  کا فیصلہ گیس پریشر کی صورتحال کو مد نظر رکھ کر کیا جائے گا