امریکہ کے قومی سلامتی کے مشیر رابرٹ اوبرائن نے مشرق وسطیٰ اورجنوبی ایشیا میں امن برقرار رکھنے کے لئے پاکستان کی کوششوں کو سراہا ہے۔

 ان خیالات کا اظہار انہوں نےواشنگٹن میں وزیر خارجہ شاہ محمود قریشی سے ملاقات کے دوران کیا۔

 شاہ محمود قریشی نے انہیں پاکستان کے اس خدشے سے آگاہ کیا کہ مشرق وسطیٰ میں عدم استحکام سے ہمسایہ ممالک اور عالمی معیشت بھی متاثر ہوگی۔

 امریکی قومی سلامتی کے مشیر نے افغانستان کے مسئلے کا پرامن سیاسی حل نکالنے کی کوششوں میں پاکستان کے کردار کو بھی سراہا۔

 کشیدگی کے خاتمے اور مذاکرات کی ضرورت پر زور دیتے ہوئے وزیرخارجہ نے کہاکہ پاکستان خطے میں امن کےلئے اپنا کردار ادا کرنے کو تیار ہے۔

مقبوضہ کشمیر میں انسانی حقوق کی صورتحال کا ذکر کرتے ہوئے وزیر خارجہ نے کہا کہ امریکہ کومقبوضہ کشمیر میں محاصرے کے خاتمے، کنٹرول لائن پر کشیدگی بڑھانے سے گریز کرنے،کشمیر کے بارے میں اقوام متحدہ کی سلامتی کونسل کی قرار دادوں پر عملدرآمد اور کشمیریوں کو حق خودارادیت دینے کےلئے بھارت پر دباو ڈالنا چاہیے۔

دوسری جانب  واشنگٹن میں امریکی ڈیموکریٹ سینیٹر کرس وان ہولن سے گفتگو کرتے ہوئے وزیر خارجہ شاہ محمود قریشی نے کہا ہے کہ پاکستان اسٹریٹجک شراکت داری کے ذریعے امریکہ کے ساتھ تعلقات کو مزید مستحکم کرنا چاہتا ہے۔

شاہ محمود قریشی کی اپنے امریکی ہم منصب سے ملاقات

 وزیر خارجہ نے سینیٹر ہولن کو مقبوضہ کشمیر میں پانچ ماہ کے لئے کرفیو ، بلاجواز پابندیوں اور سیکیورٹی کی نازک صورتحال سے آگاہ کیا۔وزیر خارجہ نے کہا کہ پاکستان امریکہ کے ساتھ تعاون میں افغان تنازعہ کا سیاسی حل اپنے منطقی انجام تک پہنچانے کے لئے پرعزم ہے۔

واضح رہے کہ  اس سے قبل  وزیر خارجہ شاہ محمود قریشی نے امریکہ سے   ذمیدارانہ انداز میں افغانستان سے انخلا کرنے کا مطالبہ کردیا تھا۔

وزیر خارجہ نے کہا کہ  اگر امریکہ یہاں سے انخلا کرنا چاہتا ہیں تو ذمہ دارانہ انداز میں نکلیں، ایسے نہیں جیسے 1980 میں کیا، جس سے ایک خلا پیدا ہوا جس کو مداخلت کرنے والی قوتوں نے بھرا۔‘

وزیرخارجہ کا کہنا تھا کہ افغانستان میں امن کے لیے امریکا اور طالبان کے درمیان مذاکرات کروانے میں پاکستان ثالثی کا کردار ادا کر رہا ہے، یہ ثالثی امریکی صدر ڈونلڈ ٹرمپ کی درخواست کے بعد شروع کی گئی۔