پاکستان تحریک انصاف (پی ٹی  آئی) کے وفد نے ناراض ہوکر وزارت چھوڑ دینے والے وزیر خالد مقبول صدیقی کومنالیا ہے۔

ذرائع کا کہناہے کہ حکومت روٹھے ہوئے اتحادیوں کو منانے کے اپنے پہلے مشن میں کامیاب ہوگئی ہے اورانہوں نےایم کیو ایم کے وزیرخالد مقبول صدیقی کو منالیا ہے۔

ذرائع کا کہنا ہے کہ حکومت خالد مقبول صدیقی کا استعفیٰ منظور نہیں کرے گی اور نہ ہی ان کی جگہ ایم کیو ایم سے کسی کو وزیربنایا جائے گا۔

ذرائع نےمزید بتایا کہ ایم کیوایم اور پی ٹی آئی کے وفود کے درمیان ہم آہنگی کیلئے ملاقات کا اگلا راونڈ بدھ کوہوگا جب کہ بہت جلد ایم کیوایم کنوینرخالد مقبول صدیقی وزیراعظم عمران خان سے بھی ملاقات کریں گے۔

دوسری جانب ایم کیوایم پاکستان سے ذرائع کا کہنا ہے کہ کابینہ میں شمولیت کا کوئی فیصلہ تاحال نہیں ہوا ہے کیوںکہ کابینہ سے زیادہ اہم مسئلہ عوامی مسائل ہیں، وفاق نے فنڈز فراہم کرنے کی یقین دہانی کرائی ہے اور فنڈز مل جائیں اس کے بعد لا ئحہ عمل بنالیں گے جب کہ حکومتی وفد سے اہم ملاقات اس ہفتے میں متوقع ہے جس کے بعد مستقبل کا تعین ہوگا۔

یاد رہےکہ  خالد مقبول صدیقی نے 12 جنوری کو حکومت سے تحفظات کا اظہار کرتے ہوئے وزارت چھوڑنے کا اعلان کیا تھا جس پر اسد عمر کی سربراہی میں حکومتی وفد انہیں منانے ایم کیو ایم پاکستان کے عارضی مرکز بھی آیا تھا جو ناکام ہوگیا تھا۔