پاکستان نے جذبہ خیر سگالی کے تحت 20 بھارتی ماہی گیروں کو جیل سے رہا کردیا۔

تفصیلات کے مطابق سمندری حدود کی خلاف ورزی کے الزام کے تحت کراچی میں ملیر ڈسٹرکٹ جیل لانڈھی سے قید 219 بھارتی ماہی گیروں میں سے 20 ماہی گیروں کو رہا کر کے ٹرین سے لاہور روانہ کردیا گیا۔

ذرائع کا کہنا ہے کہ بھارتی ماہی گیروں کو جذبہ خیر سگالی کے تحت رہا کیا گیا  اور انہیں کل واہگہ بارڈر پر بھارتی حکام کے حوالے کیا جائے گا۔

ذرائع کا یہ بھی کہنا تھا کہ گزشتہ ایک سال سے قید ان ماہی گیروں کو ملیر ڈسٹرکٹ جیل لانڈھی سے رہائی کے بعد ایدھی فاؤنڈیشن کے تعاون سے کراچی کینٹ ریلوے اسٹیشن پہنچایا گیا ۔

بھارتی فوج نے مقبوضہ کشمیر کو دنیا کی سب  سے بڑی جیل میں تبدیل کردیا، وزیراعظم

ذرائع کا مزید کہنا تھا کہ پیر کو لاہور ریلوے اسٹیشن سے انہیں جیل سیکورٹی کے عملے کی نگرانی میں واہگہ باڈر پہنچاکر بھارتی حکام کے حوالے کیا جائے گا، اس دوران ان کے تمام اخراجات ایدھی فاؤنڈیشن ادا کرے گا۔

اس موقع پر فیصل ایدھی نے  ریلوے کینٹ اسٹیشن پر میڈیا سے گفتگو کرتے ہوئے کہا کہ پاکستان کی حکومت کے 20 ماہی گیروں کو رہا گیا ہے جو کل یا پرسوں تک یہ واہگہ بارڈر تک پہنچ جائیں گے۔

فیصل ایدھی نے کہا کہ جزبہ خیر سگالی کے تحت انہیں رہا کیا جارہا ہے، ہم ماہی گیروں کو واہگہ بارڈر تک پہنچاتے ہیں اور تمام اخراجات ہم اٹھاتے ہیں ۔

فیصل ایدھی نے  یہ بھی کہا کہ انڈیا کو بھی چاہیے پاکستانی اور دیگر ماہی گیروں کو فوری رہا کریں۔