امیر جماعت اسلامی سراج الحق نے کہا ہے کہ وزیراعظم نے قوم کو سبز باغ دکھا کر ملک کو دلدل میں دھکیل دیاہے۔

تفصیلات کے مطابق امیر جماعت اسلامی سراج الحق نے اپنے ایک بیان میں کہا کہ حکومت نے دیدہ دانستہ آئی ایم ایف کی غلامی اختیار کر کے عوام سے خوشیاں اور مسکراہٹیں چھین لی ہیں ۔

امیر جماعت اسلامی نے  کہا کہ بڑھتی ہوئی مہنگائی سے حکمرانوں کے خلاف عوام کے غیظ و غضب میں اضافہ ہورہاہے  جبکہ آٹے ، چینی کے بحران پیدا کرنے والے وزیراعظم کے دائیں بائیں موجود ہیں ۔

اپنے بیان میں سراج الحق نے یہ بھی کہا کہ وزیراعظم باہرکے دوروں پر زیادہ خوش رہتے ہیں ، واپس آتے ہیں تو ان کی ڈپریشن میں اضافہ ہو جاتاہے ۔

امیر جماعت اسلامی کا کہنا تھا کہ  روزگار اور ملازمتیں دینے کے خواب دکھا کر حکومت لوگوں سے ان کے روزگا ر چھین رہی ہے ، احتساب کا خواب دکھانے والے عوام کی عدالت میں لاجواب ہوچکے ہیں۔

سراج الحق نے  اپنے بیان میں وزیراعظم عمران خان پر تنقید کرتے ہوئے کہا کہ موجودہ حکومت کسی ایک شعبہ میں بھی اچھی کارکردگی نہیں دکھا سکی ۔

کشمیر حکمرانوں کا نہیں ،پاکستان کا مسئلہ ہے ، سراج الحق

امیر جماعت اسلامی سراج الحق نے  مزید کہا کہ چوروں کوگریبانوں سے پکڑنے کے دعوے کرنے والے وزیراعظم چپ سادھے بیٹھے ہیں ، اب لڑائی الیکشن کی نہیں رہی بلکہ پاکستان کو بچانے کی لڑائی ہے ۔

واضح رہے کہ اس سے قبل بھی  سراج الحق نے لاہور میں تقریب سے خطاب کرتے ہوئے کہا  تھا کہ وزیراعظم کے قوم سے وعدے ہوا میں تحلیل ہو گئے ہیں، موجودہ حکومت وینٹی لیٹر پر ہے مصنوعی سانس سے کب تک زندگی بچائی جائے گی ۔

سراج الحق نے کہا تھا کہ وزیراعظم نے اعلان کیا تھاکہ پی ٹی آئی کے سونامی نے لوگوں سے روزگار ، چھت اور اب نوالہ چھیننا شروع کردیا ہے ۔