وزیراعظم عمران خان کی زیر صدارت جمعرات کو اسلام آباد میں پاکستان اسٹیل ملز سے متعلق اجلاس ہوا۔

پاکستان اسٹیل ملز اجلاس میں وفاقی وزیر میری ٹائم امور سیّد علی حیدر زیدی، وزیر منصوبہ بندی اسد عمر، وزیر نجکاری محمد میاں سومرو، وزیراعظم کے مشیر برائے خزانہ ڈاکٹر عبدالحفیظ شیخ، مشیر تجارت عبدالرزاق دائود، ادارہ جاتی اصلاحات کیلئے وزیراعظم کے مشیر ڈاکٹر عشرت حسین، وزیراعظم کے معاون خصوصی ندیم بابر اور سینئر افسران نے شرکت کی۔

واضح رہے اس سے قبل اسلام آباد میں وزیراعظم عمران خان کی زیر صدارت وفاقی کابینہ کا اجلاس ہوا تھا جس میں ملک میں بڑھتی مہنگائی کے ساتھ دیگر اہم موضوعات پر مشاورت کی گئی تھی۔

کابینہ کا مہنگائی سے نمٹنے کے لئے مزید ہنگامی اقدامات اٹھانے اور اشیاء خورد و نوش کی قیمتیں بھی نہ بڑھانے کا فیصلہ کیا گیا تھا۔

وزیراعظم عمران خان کی آٹا اور چینی بحران سے متعلق اہم ہدایات جاری کرتے ہوئے ایک ہفتے میں رپورٹ طلب کرلی ہے ۔

وزیر اعظم نے دالوں پر ریگولیٹری ڈیوٹی چھوٹ سے متعلق لائحہ عمل تیار کرنے کی بھی ہدایت دے دی جبکہ کابینہ نے پاک ترک معاہدوں اور تقرریوں سمیت بیشتر ایجنڈہ آٹیٹمز کی بھی منظوری دیدی ۔

بجلی اور گیس کی قیمتیں نہیں بڑھائیں گے، وفاقی کابینہ کا اصولی اتفاق

وفاقی کابینہ کے اجلاس میں مہنگائی،بجٹ رپورٹ اور ٹیکس محصولات پر طویل بات چیت کی گئی اور اس متعلق وزیراعظم کا کہنا تھا کہ حکومت کو عوام کا بہت احساس ہے، اب عوام کو حکومتی فیصلوں سے ریلیف نظر آئے گا۔

کابینہ اجلاس میں وفاقی وزراء نے بھی مہنگائی کنٹرول کرنے کے لئے تجاویز دیں جبکہ  آٹا،چاول ،دالیں ،چینی اور گھی کی قیمتیں کنٹرول میں رکھنے کے لئے موثر حکمت عملی تیار کرلی گئی ہے۔

کابینہ کی جانب سے ہدایت جاری کی گئی کہ یوٹیلیٹی اسٹورز انتظامیہ بنیادی اشیاء کی کمی نہ آنے دیں۔

وفاقی کابینہ نے ای سی سی کے فیصلوں کی توثیق کردی ،جس کے مطابق سعدیہ خان سیکیورٹی ایکسچینج کمیشن آف پاکستان کی کمشنر مقرر کر دی گئی ہیں۔