جمعیت علمائے اسلام ف کے سربراہ مولانا فضل الرحمان نے کہا ہے کہ اب وقت قریب آرہا ہے کہ بھارتی مظالم کاخاتمہ ہوگا اور کامیابی کشمیرعوام کی ہوگی۔

 تفصیلات کے مطابق جمعیت علمائے اسلام ف کے سربراہ مولانا فضل الرحمان نے کشمیر کے حوالے سے اپنے ایک بیان میں کہا کہ پاکستانی قوم کل 5 فروری کو  سڑکوں پر نکل کر کشمیری عوام کے ساتھ یکجہتی کا پیغٖام دے گی۔

اپنے بیان میں جمعیت علمائے اسلام ف کے سربراہ نے کہا کہ جے یو آئی کشمیر ی عوام کی جدوجہد آزادی کی مکمل حمایت جاری رکھے گی۔

  مولانا فضل الرحمان نے یہ بھی کہا کہ جے یو آئی کارکن جلسے ،جلوس ،ریلیوں اور دیگر پروگراموں کے ذریعے بھارتی مظالم کے خلاف نفرت کا اظہار کرے گی۔

مولانا فضل الرحمان  کا کہنا تھا کہ کشمیریوں کو حقیقت میں جبر کے پہاڑوں میں انڈیا نے دبا یا ہوا ہے ، کشمیر کے مسئلے پر دنیا انسانیت کے بنیا دی حقوق کا نعرہ بھول گئی ہے، بھارت نے کرفیو کے مسلسل نفاذ سے کشمیری عوام کو گھروں میں محصور کیا ہوا ہے۔

5 فروری کو کشمیری بھائیوں سے اظہار یکجہتی کی تیاریاں جاری

جمعیت علمائے اسلام ف کے سربراہ مولانا فضل الرحمان کا مزید کہنا تھا کہ  کشمیر میں بھارتی مظالم پر عالم دنیا کی خاموشی قابل مذمت ہی نہیں بلکہ  قابل نفرت بھی ہے، ہم عالمی دنیا کو پیغام دیں کہ کشمیر میں جاری بھارتی ریاستی درندگی کسی صورت قبول نہیں۔

یاد رہے کہ مقبوضہ کشمیر میں بدترین لاک ڈاؤن جاری ہے ، کشمیری عوام تین ماہ سے زائد عرصے سے قیدیوں کی زندگی گزارنے پر مجبور ہیں۔

وادی مقبوضہ کشمیر کی سڑکیں سنسان، دکانیں بند، کاروباری مراکز پر تالے پڑے ہیں، مسلسل کرفیو کے باعث کاروبار زندگی درہم برہم، گلیوں اورسڑکوں پر بھارتی فوج کا گشت، گھروں کے باہر بھی فوجی تعینات، گھروں میں محصورافراد کو اپنے رشتہ داروں کے جنازے تک پڑھنے کی بھی اجازت نہیں،اسکول بند ہیں، اسپتالوں میں ڈاکٹرز کا پہنچنا دشوار ہوگیا، طبی امداد نہ ملنے سے مریضوں کی زندگیاں بھی داؤ پر لگ گئیں، ہر روز سات سے آٹھ افراد کو دل کا دورہ پڑرہا ہے لیکن علاج معالجے کی کوئی سہولت میسرنہیں۔