امیر جماعت اسلامی سراج الحق نے کہا ہے کہ پی ٹی آئی حکومت کا جنازہ نکل چکا ہے ۔

تفصیلات کے مطابق امیر جماعت اسلامی سراج الحق نے اپنے ایک بیان میں عمران خان پر تنقید کرتے ہوئے کہا ہے کہ وزیراعظم کے دو افراد پر مشتمل گھرانے کا دو لاکھ میں گزارا نہیں ہو رہا،خود وزیراعظم پریشان ہیں

سراج الحق نے  کہا کہ تبدیلی کے نام پر مہنگائی اور نیا پاکستان قبول نہیں، ہمیں پرانا پاکستان واپس کیا جائے ۔

امیر جماعت اسلامی نے یہ بھی کہا کہ  موجودہ حکمرانوں نے عوام کی مشکلات اور پریشانیوں میں اضافہ کر دیا ہے ، وزیراعظم خود کہا کرتے تھے مہنگائی ہو تو سمجھو حکمران چور ہے تو اب عوام حکمرانوں کو چور سمجھنے میں حق بجانب ہیں ۔

سراج الحق کا کہنا تھا کہ  قوم مطالبہ کرتی ہے کہ آئی ایم ایف کے معاہدوں کو منسوخ کیا جائے  لیکن وزیراعظم اپنی ناکامیاں چھپانے کے لیے اداروں کو بدنام کر رہے ہیں۔

امیر جماعت اسلامی  نے کہا  کہ  دنیا مریخ اور چاند پر پہنچ گئی،ہمارے حکمران مرغی ، کٹے کی گردن پر سوار ہوکر ترقی کا سفر کرنا چاہتے ہیں، ایسا احتساب جس میں تمہارا چور مردہ باد اور ہمارا چور زندہ باد ، کوئی قبول نہیں کرے گا ۔

سراج الحق نے یہ بھی کہا کہ جماعت اسلامی نے مہنگائی بے روزگاری کے خلاف تحریک کا آغاز کردیا ہے، عوام جماعت اسلامی کا ساتھ دیں۔

حکمرانوں نے عوام کی مشکلات میں اضافہ کر دیا ہے، سراج الحق

امیر جماعت اسلامی سراج الحق نے مزید کہا کہ ملک گیر سطح پر مہنگائی کے خلاف احتجاجی مظاہرے ، ریلیاں اور جلسے ہوں گے جبکہ 26 فروری کو مہنگائی و بے روزگاری کے خلاف تیمر گرہ میں عوامی مارچ ہوگا۔

واضح رہے کہ اس سے قبل بھی  سراج الحق نے لاہور میں تقریب سے خطاب کرتے ہوئے کہا  تھا کہ وزیراعظم کے قوم سے وعدے ہوا میں تحلیل ہو گئے ہیں، موجودہ حکومت وینٹی لیٹر پر ہے مصنوعی سانس سے کب تک زندگی بچائی جائے گی ۔

سراج الحق نے کہا تھا کہ وزیراعظم نے اعلان کیا تھاکہ حکمرانوں کے سونامی نے لوگوں سے روزگار ، چھت اور اب نوالہ چھیننا شروع کردیا ہے ۔

امیر جماعت اسلامی سراج الحق نے مزید کہا تھا کہ حکومت کی غلط پالیسیوں نے عوام کو نان شبینہ کا محتاج بنادیا ہے، حکومت کو ووٹ اور سپورٹ دینے والے سب کو مشکلات  کا سامنا ہیں ۔