چیئرمین پیپلزپارٹی بلاول بھٹو زرداری نے کہا ہے کہ جلد ہی پاکستان میں پیپلز پارٹی کا دور شروع ہونے والا ہے۔

تفصیلات کے مطابق پاکستان پیپلزپارٹی کے چیئرمین بلاول بھٹو زرداری کا کوئٹہ کے شمولیتی جلسے کے شرکاء سے ٹیلیفونک خطاب کیا۔

بلاول بھٹو نے کہا ہے کہ بلوچستان والے بھٹو شہید سے بی بی شہید اور صدر زرداری سے اب تک ہمارا ساتھ دے رہے ہیں، میں بلوچستان تنظیم بالخصوص روزی خان کاکڑ کا شکریہ ادا کرتا ہوں کہ وہ بھٹو ازم کے پیغام کو گھر گھر پھیلارہے ہیں۔

انہوں نے کہا کہ پاکستان پیپلزپارٹی کا دور اب شروع ہونے والا ہے جس کے بعد ہم نے شہید محترمہ بے نظیر بھٹو کے مشن کو مکمل کرنا ہے۔

اپنے خطاب میں انہوں نے کہا کہ عوام کرونا وائرس کی وجہ سے پریشانی سے دوچار ہیں لیکن وفاقی کٹھ پتلی حکومت کو کوئی دلچسپی نہیں کہ وہ عوام کے مسائل حل کرے، وفاقی حکومت کی واحد دلچسپی اپنے کٹھ پتلی راج کو برقرار رکھنا ہے۔

انہوں نے کہا کہ وفاقی حکومت کی واحد دلچسپی ہماری آواز کو دبا کر ہماری جدوجہد کو روکنا ہے لیکن ہماری آواز کو دبانے اور جدوجہد کو روکنے کی کوشش پی ٹی آئی حکومت کی بھول ہے، ہم ایوب، ضیا اور مشرف کی آمریت سے نہیں ڈرے اس کے سامنے یہ کٹھ پتلی تو کوئی چیز نہیں ہے۔

ان کا کہنا تھا کہ انشاء اللہ تعالٰی پاکستان پیپلزپارٹی کے جیالے اس کٹھ پتلی کو گھر بھیج دیں گے اور ہمارے کے جیالے عوامی حکومت بنائیں گے، ہم ایک عوامی حکومت بنائیں گے جو غریب کی خدمت کرے گی۔

اس موقع پر انہوں نے اپنے خطاب میں کہا ہے کہ میں آپ کے ساتھ کھڑا ہوکر آپ کے مسائل کو وفاق کے سامنے رکھوں گا کیونکہ پاکستان پیپلزپارٹی نے بلوچستان کے عوام کو سب سے زیادہ وسائل دئیے ہیں۔

انہوں نے کہا کہ اگر روزگار، تنخواہوں اور پنشن میں اضافہ چاہئیے تو ایک بار پھر عوامی حکومت بنانا ہوگی، اگر آپ نے ہمیں موقع دیا تو ہم پھر ایسا نظام بنائیں گے کہ غریب ملکی معیشت اور سیاست کے فیصلے کریں۔

انہوں نے کہا کہ شہید ذوالفقار علی بھٹو نے ہمیں غریب عوام کی خدمت کرنا سکھایا ہے اور شہید ذوالفقار علی بھٹو اس ملک کے غریب عوام کے لئے آواز بنے ہیں، انہوں نے بڑے زمین داروں سے زمین لے کر غریبوں کو دلوائی اور مزدوروں کو صنعتوں کا مالک بنایا تھا کیونکہ پاکستان کے غریب عوام اس ملک کے حقیقی وارث ہیں۔