وزیراعظم عمران خان نے ایف نائن پارک اسلام آباد کے بالمقابل مجوزہ بلیو ایریا کے مقام کا دورہ کیا۔

تفصیلات کے  مطابق پاکستان تحریک انصاف کی حکومت کے پہلے بڑے میگا پروجیکٹ کی منصوبہ بندی مکمل ہوگئی جس کا جائزہ لینے کے لیے وزیر اعظم عمران خان خود ’نیو بلیو ایریا ‘سائٹ پر پہنچ گئے۔

اس موقع پر وزیراعظم عمران خان نے انتظامات کا جائزہ لیا جبکہ  وزیر اعظم کو نیلامی کے طریقہ کار پر بریفنگ دی گئی۔

وزیر اعظم کو بریفنگ میں بتایا گیا کہ منصوبے کے لیے ایف 9 پارک کے سامنے 170 کنال زمین مختص کی گئی ہے، جدید تعمیرات اور ہائی رائز بلڈنگ پر مبنی کمرشل سٹی عالمی طرز پر تعمیر ہوگا۔

بریفنگ میں کہا گیا کہ لندن، دبئی، مانچسٹر، شکاگو اور گلاسکو سمیت بڑے شہروں میں روڈ شو ہوں گے، وفاقی ترقیاتی ادارہ اپریل کے پہلے ہفتے میں کمرشل نیلامی کرے گا جبکہ اوور سیز پاکستانیوں کو سرمایہ کاری کی خصوصی دعوت دی جائے گی۔

وزیراعظم کا بھارت میں مسلمانوں پر مظالم پر سخت تشویش کا اظہار

وزیر اعظم کی ہدایت پر نیلامی میں حصہ لینے والوں کو سہولت دینے کا فیصلہ کیا گیا ہے اور مکمل ایڈوانس ٹیکس دینے کی شرط ختم کردی گئی ہے جبکہ کامیاب بولی دہندگان کو رقم کی ادائیگی کے لیے 30 دن کا وقت ملے گا   اور   اوور سیز پاکستانیوں کو بھی رقم کے انتظام کے لیے مناسب وقت دیا جائے گا۔

حکام نے وزیراعظم کو بریفنگ دیتے ہوئے کہا  کہ اگلے ماہ ہونے والی کمرشل نیلامی سے حاصل ہونے والی رقم وفاقی دارالحکومت کی بہتری، خدمات کی فراہمی اور ماحول کی بہتری کیلئے خرچ کی جائے گی جبکہ اس رقم کا کچھ حصہ کم لاگت کے مکانات خصوصاً نیا پاکستان ہائوسنگ اینڈ ڈویلپمنٹ اتھارٹی کے ذریعے منظور شدہ کچی آبادیوں کے مکینوں کو باوقار رہائش کی فراہمی پر خرچ کیا جائے گا۔

 وزیراعظم عمران خان نے کہا کہ منصوبے سے روزگار اور معاشی سرگرمیوں میں اضافے سمیت تعمیراتی انڈسٹری کو بھی فروغ ملے گا۔