ترجمان مسلم لیگ ن مریم اورنگزیب نے کہا ہے کہ صحت عامہ کے شعبے کی تباہی کا ذمہ دار عمران صاحب ہیں۔

تفصیلات کے مطابق ترجمان مسلم لیگ ن مریم اورنگزیب نے سماجی رابطے کی ویب سائٹ  ٹویٹر پر اپنے ایک پیغام میں کہا کہ وزیر صحت عمران نیازی نے دو سال میں ہر شعبہ کی طرح صحت عامہ کے شعبے کابھی بیڑہ غرق کردیا ہے۔

مریم اورنگزیب نے کہا کہ وزیر صحت عمران خان کی وجہ سے اسلام آباد کے اسپتالوں کی مینجمنٹ کا برا حال ہے، اسلام آباد کا سب سے بڑا ہسپتال عارضی انتظام پر چل رہا ہے۔

ترجمان مسلم لیگ ن نے یہ بھی کہا کہ ڈاکٹرز، نرسز اور طبی عملہ ہتھیاروں کے بغیر کورونا کی خلاف جنگ لڑ رہے ہیں۔

ترجمان مسلم لیگ ن کا کہنا تھا کہ وزیرصحت عمران خان نے عدالتی حکم کے باوجود اب تک پی ایم ڈی سی کو بحال نہیں ہونے دیا ، نیشنل انسٹی ٹیوٹ آف ریہیبلیٹیشن میڈیسن (این۔آئی۔آر۔ایم) عارضی انتظام پر چلایا جا رہا ہے۔

شہباز شریف کے نیب میں پیش نہ ہو نے کی وجہ مریم اورنگزیب نے بتا دی

مریم اورنگزیب کا یہ بھی کہنا تھا کہ وزیر صحت عمران خان اب تک سیکریٹری صحت کا تقرربھی عمل میں نہیں لاسکاجبکہ ڈرگ ریگولیٹری اتھارٹی (ڈریپ) کا مستقل سربراہ اب تک تعینات نہیں ہوسکا اور وزیرصحت عمران خان اب تک مستقل ڈائریکٹر جنرل ہیلتھ تعینات نہیں کرسکا۔

انھوں نے کہا کہ پارلیمانی کمیٹی تشکیل دی جائے تاکہ اربوں روپے کی ادویات سکینڈل کی شفاف تحقیقات ہوسکیں جبکہ وزیراعظم عمران خان وزیر صحت عمران خان کی کرپشن کا جواب دیں۔

ترجمان مسلم لیگ ن مریم اورنگزیب نے مزید کہا کہ   پاکستان مسلم لیگ (ن) کے دور میں شروع ہونے والے صحت کے 20 منصوبوں کو موجودہ حکومت نے ختم کردیا، وزیراعظم نواز شریف کے شروع کردہ صحت کارڈ کو انصاف صحت کارڈ میں بدل دینا ہی عمران صاحب کی واحد کارکردگی ہے۔