وزیراعلیٰ سندھ سید مراد علی شاہ نے کہا ہے کہ آج سے کاروبا ر ایس او پی کے تحت دئے گئے وقت کے مطابق شروع ہوا ہے اور تمام کاروباری دوستوں کو بتائی گئی ایس او پی تحت کام کرنا ہے۔

انہوں نے کہا کہ میں خود بھی شہر کا دورہ کر کے جائزہ لوں گا، انتظامیہ کسی کو ہراساں نہیں کرے گا لیکن ایس او پی پر عمل کویقینی بنائیں۔

گذشتہ 24 گھنٹوں میں کورونا کے 3730 ٹیسٹ کیے گئے جس کے بعد آج 537 کورونا کے نئے کیسز سامنے آئے ہیں، جو ٹیسٹوں کا 14.4 فیصد ہے۔

انہوں نے کہا کہ اس وقت تک 95053 ٹیسٹ کئے گئے، جس میں 12017 کیسز آئے اور گذشتہ 24 گھنٹوں میں 11 مریض انتقال کرگئے، اللہ پاک انتقال کرنے والوں کے درجات بلند کرے اور لواحقین کو صبر دے۔

ان کا کہنا تھا کہ اس وقت تک 200 مریض کورونا کے باعث انتقال کر چکے ہیں جبکہ آج 68 مریض صحتیاب ہوکر گھروں کو چلے گئے ہیں جس کے بعد صحتیاب ہونے والوں کی مجموعی تعداد 2149 ہے۔

وزیراعلیٰ سندھ نے کہا ہے کہ 537 کیسز میں سے 432 نئے کیسز کا تعلق کراچی سے ہے، ملیر میں 142، وسطی میں 62 اور شرقی میں 61 نئے کیسز سامنے آئے، جنوبی اور کورنگی میں 58-58 جبکہ غربی میں 51 مزید کیسز رپورٹ ہوئے۔

 سید مراد علی شاہ نے بتایا کہ سکھر میں 22، شکارپور میں 19اور قمبرشہداد کوٹ میں 11 نئے کیسز ظاہر ہوئے، ٹنڈوالہیار 8، لاڑکانہ 7، حیدرآباد، سانگھڑ اور مٹیاری میں 4-4 مزید کیسز آئے، جیکب آباد 3، سجاول 2، میرپور خاص، جامشورو اور بدین میں ایک ایک کیسز آئے ہیں۔