کشمیر ہائی وے کا نام تبدیل کرکے سرینگر ہائی وے رکھ دیا گیا ہے، اس ضمن میں وزیر مواصلات مراد سعید نے سرینگر ہائی وے کی تختی کی نقاب کشائی کردی ہے۔

وفاقی وزیر مواصلات مراد سعید نے میڈیا سے گفتگو کرتے ہوئے بتایا ہے کہ نریندرمودی نئے دور کا ہٹلر ہے۔

انہوں نے کہا ہے کہ کشمیر کے معاملے پر پورا پاکستان متفق ہے اور مقبوضہ کشمیر میں شہید ہونیوالوں کو سبز ہلالی پرچم میں دفنایا جاتا ہے۔

وفاقی وزیر کا کہنا تھا کہ وزیر اعظم عمران خان نے دنیا میں پاکستان کا مقدمہ لڑا ہے اور انشااللہ کشمیر بنے گا پاکستان، اب ہر شہری کا یہی نعرہ ہے کہ کشمیر بنے گا پاکستان کیونکہ کشمیر کاز کے لئے ملک کا ہر شہری متفق ہیں۔

ان مزید کہنا تھا کہ ہم نے بھارت کوبے نقاب کرنا ہے، کشمیری بہن بھائیوں کا ساتھ دینا ہے کیونکہ کشمیری نوجوان جدوجہد آزادی کوایک اور مقام پرلے گئے ہیں۔

مقبوضہ کشمیر میں بھارتی محاصرے کو ایک برس مکمل، یادگاری ٹکٹ جاری

میڈیا سے گفتگو کرتے ہوئے ان کا کہنا تھا کہ کشمیر کے بھارتی محاصرے کو ایک سال مکمل ہو گیا ہے لیکن وہ دن دور نہیں جب ہم کشمیری بھائیوں کے ساتھ جامع مسجد سری نگر میں جمعہ ادا کریں گے۔

اس سے قبل مقبوضہ کشمیر کے یک طرفہ الحاق اور بھارتی محاصرے کو ایک برس مکمل ہونے پر پاکستان نے یادگاری ٹکٹ جاری کردیا کیا ہے۔

وزیر اطلاعات شبلی فرازاور وزیر مواصلات مراد سعید نے یادگاری ٹکٹ کی رونمائی کے موقع پر کہا کہ یہ ٹکٹ دنیا بھر میں بھارتی مظالم کی عکاسی کرے گا۔

انہوں نے کہا ہے کہ عوام پانچ اگست کو گھروں پر قومی اور کشمیر کے پرچم بلند کریں تاکہ کشمیریوں کو احساس ہو کہ پاکستان ان کے ساتھ کھڑا ہے۔

ان کا مزید کہنا تھا کہ ہم اس وقت تک آرام سے نہیں بیٹھیں گے جب تک اس کاز کوانجام تک نہ پہنچا لیں۔