دفتر خارجہ نے کہا ہے کہ مقبوضہ کشمیر میں ہر قسم کی آزادی صلب کرلی گئی ہے ۔
ترجمان دفتر خارجہ زاہد حفیظ چوہدری کا ہفتہ وار پریس بریفنگ میں کہنا تھا کہ گذشتہ روز بھارت کےمقبوضہ کشمیر کے غیر قانونی و یکطرفہ اقدامات کو 400 روز مکمل ہو گئے ۔
زاہد حفیظ چوہدری نے کہا کہ بھارتی قابض افواج کی جانب سے کشمیریوں کا ماورائے عدالت قتل عام جاری ہے۔ اگست میں بیس سے زائد کشمیریوں کا قتل عام کیا گیا۔
انہوں نے کہا کہ بھارتی رہنما جو کہ کشمیریوں کے معیار زندگی کی بہتری کا دعویٰ کرتے تھے وہ کشمیریوں کے قتل عام،انسانی حقوق کی خلاف ورزیوں اور ان کی بینائی چھیننے کے واقعات سے انکار نہیں کر سکتے۔
ترجمان دفتر خارجہ نے کہا کہ سیکریٹری خارجہ نے گذشتہ روز او آئی سی اور آج یورپی یونین سفراء کو مقبوضہ کشمیر کی صورتحال سے آگاہ کیا ہے۔
زاہد حفیظ چوہدری نے مزید کہا کہ مقبوضہ کشمیر میں ہر قسم کی آزادی صلب کی گئی ہے ، متعدد کشمیری گرفتار ہیں ۔ کشمیریوں کو جعلی مقابلوں میں نشانہ بھی بنایا جا رہا ہے ۔
انہوں نے کہا کہ دنیا بھر سے کشمیر کی صورتحال کی مذمت کی جا رہی ہے۔ فروری 2020 کے دورہ پاکستان میں سیکریٹری جنرل اقوام متحدہ نے مقبوضہ کشمیر میں انسانی حقوق کی خلاف ورزیوں کو اجاگر کیا۔
ترجمان دفتر خارجہ نے کہا کہ بین الاقوامی برادری بھارت کو اقوام متحدہ سلامتی کونسل کی قراردادوں اور بین الاقوامی قوانین کے مطابق مسئلہ کشمیر حل کرنے کے لیے مجبور کرے۔
ایل او سی کی صورتحال پر ترجمان دفتر خارجہ کا کہنا تھا کہ بھارت کی ایل او سی پر جنگ بندی کی خلاف ورزیاں جاری ہیں۔ اب تک ان خلاف ورزیوں میں 17 نہتے شہری شہید اور 170 زخمی ہو چکے ہیں۔
زاہد حفیظ چوہدری نے مزید کہا کہ وزیر خارجہ ایس سی او کے وزرائے خارجہ کونسل کے اجلاس کے لیے ماسکو میں ہیں۔ وزیر خارجہ ایس سی او اجلاس کی سائیڈ لائن پر مختلف رہنماؤں اور ہم منصبوں سے ملاقاتیں کریں گے۔
انہوں نے کہا کہ گذشتہ روز وزیر خارجہ کی تاجکستان کے ہم منصب سے ملاقات ہوئی تھی۔
ترجمان دفتر خارجہ نے کہا کہ چین بھارت سرحدوں پر صورتحال ان ممالک کے درمیان معاہدوں اور امن کی خلاف ورزی ہے۔ چاہتے ہیں کہ بات چیت سے چین بھارت صورتحال کو باہمی معاہدوں کے مطابق حل کیا جائے۔
افغانستان سے متعلق زاہد حفیظ چوہدری کا کہنا تھا کہ پاکستان نے تسلسل سے کہا ہے کہ افغان امن عمل ایک سنجیدہ مرحلے میں داخل ہو چکا ہے۔ فریقین افغان امن عمل کے اس نازک موقع کو ہاتھ سے نہ جانے دیں۔
انہوں نے کہا کہ پاکستان افغانستان میں قیام امن کے حوالے سے حمایت جاری رکھے گا۔
ترجمان دفتر خارجہ نے کہا کہ بھارت مسلمانوں کو قربانی کا بکرا بنانے کی بجائے کورونا کے خلاف قابو پانے پر توجہ دے۔
زاہد حفیظ چوہدری کا کہنا تھا کہ بھارت میں پاکستانی ہندوؤں کے قتل کے بعد ان کی بیٹی کی پریس کانفرنس دیکھی ہے۔انہوں نے الزام لگایا ہے کہ بھارتی انٹیلی جنس ایجنسی راء نے ان کے اہلخانہ کو پاکستان کے خلاف جاسوسی پر مجبور کیا اور ناکامی پر انہیں زہر دے کر قتل کر دیاگیا۔
انہوں نے کہا کہ ہم بھارت سے بار ہا اس واقعہ کی شفاف تحقیقات،ایف آئی آر کی نقل کی فراہمی،اسٹاف ڈاکٹر کی رپورٹ اور نتائج پاکستان کو فراہم کرنے کا مطالبہ کر چکے ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News