وزیر اعظم عمران خان کا کہنا ہے کہ  زیادتی کے مجرم کو عبرت ناک سزا  دینے  کے لیے سخت قانون لانے پر کام کر رہے ہیں ۔

 پارلیمنٹ  کے مشترکہ اجلاس سے خطاب کرتے ہوئے وزیر اعظم عمران خان نے کہا کہ   موٹروے پر ایک ایسا حادثہ ہوا جس سے پورا ملک ہل گیا۔جب سے یہ حادثہ ہوا تب سے سوچ رہا ہوں کہ اس پر سخت قانون لایا جائے۔

وزیر اعظم نے کہا کہ  بچوں اور خواتین کے ساتھ زیادتی کے کیسز بہت کم رپورٹ ہوتے  ہیں۔ جنسی زیادتی سے متاثرہ افراد کی  پوری زندگی تباہ ہوجاتی ہے۔

عمران خان نے کہا کہ پولیسنگ رجسٹریشن کے نظام پر کام کر رہے ہیں، پوری دنیا میں جنسی زیادتی کرنے والوں کا ڈیٹا اکٹھا کیا جاتا ہے، مجرم عابد  جنسی زیادتیوں کے متعدد کیسز میں ملوث ہے۔

انہوں نے مزید کہا کہ  اگر ان مجرموں کو پکڑ بھی لیا جائے تو انہیں سزا دینا آسان نہیں ہے۔  جس طرح کے ثبوت اکٹھے کرنے ہوتے ہیں وہ بہت مشکل مرحلہ ہے، گواہان اور شواہد کے معاملے کو سنجیدگی سے دیکھ رہے ہیں۔

وزیر اعظم کا کہنا تھا کہ  ہم اتنا سخت قانون لانے کے لیے کام کر رہے ہیں کہ مجرم کو عبرت ناک سزا دی جائے۔

ایف اے ٹی ایف سے متعلق وزیر اعظم کا کہنا تھا کہ ایف اے ٹی ایف کے معاملے کو پوری دنیا دیکھ رہی ہے۔ ایف اے ٹی ایف بل  کو کرپشن بچانے کے لیے استعمال کیا گیا ہے۔

کورونا وباء سے متعلق بات کرتے ہوئے عمران خان کا کہنا تھا کہ   جس طرح کورونا میں سے پاکستان نکلا کوئی یہ امید نہیں رکھ رہا تھا ۔  دنیا کہہ رہی ہے کہ پاکستان سے سیکھو کہ وہ کورونا سے کیسے نکلا۔ عالمی ادارہ صحت نے بھی پاکستان کی کاوشوں کی تعریف کی ہے۔

وزیر اعظم نے کہا کہ پاکستان میں اب کیسز بھی کنٹرول میں ہیں اور ہم نے معیشت بھی بچا لی ہے۔

انہوں نے کہا کہ  ہماری معیشت پر اگر پریشر بڑھتا تو بہت برے حالات ہوتے، مجھے تو امید تھی کہ اپوزیشن ہمارے اقدامات کی تعریف  کرے گی لیکن میرے دل میں اپوزیشن کے لیڈران پر جو خدشہ تھا وہ پورا ہوگیا۔

وزیر اعظم نے کہا کہ  ایف اے ٹی ایف کے حوالے سے سب کو علم ہونا چاہیے کہ گرے لسٹ ہمیں وراثت میں ملی ہے۔

عمران خان کا کہنا تھا کہ  ایف اے ٹی ایف  کے بلیک لسٹ ہونے کا مطلب یہ ہے کہ پاکستان پر پابندیاں  لگ جاتیں اور بیرون ممالک سرمایہ کاری رک جاتی۔

انہوں نے کہا کہ  پاکستان پہلے ہی مالی مشکلات کا شکار ہے کیونکہ پیسہ گراوٹ کا شکار ہے، بجلی، پٹرول کی قیمت بڑھنے سے مزید مہنگائی بڑھ جاتی ہے۔