وزیراعظم نے کہا ہے کہ ترقی یافتہ ملکوں کی خوشحالی کا راز قانون کی حکمرانی ہے لیکن جہاں حکمرانوں نے کرپشن کی اور خود کو قانون سے بالاتر سمجھا وہ قومیں تنزلی کا شکار ہوئیں ہیں۔
وزیراعظم نے بتایا کہ ملک ترقی کی راہ پر گامزن ہے اس لئے اپوزیشن کو حکومت گرانے کی جلدی ہے۔
اس سے متعلق انہوں نے کہا ہے کہ اپوزیشن کا مسئلہ جمہوریت نہیں کرپشن کا مال بچانا ہے اور اگر جمہوریت کا مسئلہ ہو تو سب سے بڑی جمہوری مثال میں خود ہوں کیونکہ پاکستان کی تاریخ میں عمران خان پہلی دفعہ پانچ حلقوں سے منتخب ہوا ہے۔
وزیراعظم عمران خان نے کہا ہے کہ یہ بات حق ہے کہ کفر کا نظام چل سکتا ہے لیکن نا انصافی کا نظام نہیں چل سکتا ہے اور قائداعظم کے نظرئے پر چل کر ہی ملک آگے بڑھ سکتا ہے۔
وزیراعظم نے بتایا کہ مسلمان معاشرہ ریاست مدینہ کے اصولوں پر عمل پیرا ہوکر ہی مثالی بنا تھا کیونکہ ریاست مدینہ میں کوئی بھی قانون سے بالاتر نہیں تھا اور قانون کی بالادستی کے بغیر خوشحالی ممکن نہیں ہے۔
خیال رہے کہ ان تمام خیالات کا اظہار وزیراعظم عمران خان نے آل پاکستان انصاف لائرز فورم کے زیر اہتمام سیمینار سے خطاب کے دوران کیا ہے۔
تقریب میں وزیراعظم عمران خان کی سیاسی جدوجہد کے حوالے سے ڈاکیومنٹری بھی دکھائی گئی ہے۔
خطاب کے دوران عمران خان نے کہا ہے کہ پاکستان میں کچھ عناصر خود کو قانون کے سامنے جواب دہ نہیں سمجھتے ہیں کیونکہ یہ لوگ سمجھتے ہیں کہ یہ جومرضی کریں ان سے کچھ پوچھا نہیں جاسکتا ہے۔
انہوں نے بتایا کہ یہ عناصر عدالتوں کے فیصلوں کو بھی تسلیم نہیں کرتے ہیں اور پیغام دیتے ہیں کہ یہ خاص طبقہ ہے جن پر کسی قانون کا اطلاق نہیں ہوتا ہے۔
وزیراعظم کا کہنا تھا کہ سڑکوں پر نکل کر عمران خان کو بلیک میل کرنے کا خواب دیکھنے والے ناکام ہونگے کیونکہ یہ تمام لوگ مل کر بھی احتجاج کرلیں تو انہیں کچھ حاصل نہیں ہوگا۔
اس ضمن میں وزیراعظم کا کہنا تھا کہ ان لوگوں کا نظریہ اپنی کرپشن کو بچانا ہے، باہر جانے کیلئے بیماری اور منت سماجت کا راستہ اختیار کیاگیا اور لندن کی ہوا لگتے ہی نیا نوازشریف سامنے آگیا جبکہ نوازشریف نے آج تک اپنی دولت اور اثاثوں کے بارے میں کوئی مصدقہ دستاویز نہیں دی گئی ہے۔
انہوں نے کہا ہے کہ کتنی حیرانی کی بات ہے کہ تین بار وزیراعظم رہنے والے کے پاس ثبوت کیلئے کچھ نہیں ہے جبکہ میں نے سپریم کورٹ میں اپنے تمام اثاثوں کی تفصیل پیش کی ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News