رانا ثنا اللہ نے کہا ہے کہ سابق وزیر اعظم نواز شریف سرجری کے بعد جلد وطن واپس آئیں گے۔

تفصیلات کے مطابق مسلم لیگ ن کے مرکزی رہنما رانا ثنا اللہ نے میڈیا سے بات کرتے ہوئے کہا کہ عوام کے فیصلے کو تسلیم کیے بغیر یہ ملک نہیں چل سکتا، استعفے بھی دیں گے اور لانگ مارچ بھی ہو گا۔

انہوں نے کہا کہ یہ 3 سال سے میرے خلاف انکوائری کر رہے تھے جبکہ میں نے اپنی تمام جائیداد ایف بی آر میں ظاہر کی ہوئی ہے، اور اب مجھے منی لانڈرنگ کا نوٹس دے دیا گیا ہے۔

رانا ثنا اللہ نے کہا کہ قومی احتساب بیورو (نیب) میں اپوزیشن کے خلاف جھوٹے مقدمات بنائے جا رہے ہیں تاہم جھوٹے مقدمے ہمیں نہیں روک سکتے۔

مسلم لیگی رہنا نے مزید کہا کہ  سینیٹ انتخابات کا ہماری تحریک سے کوئی تعلق نہیں ہے اور پاکستان ڈیمو کریٹک (پی ڈی ایم) کی تحریک کا سینیٹ الیکشن سے کوئی تعلق نہیں ہے۔

دوسری جانب مسلم لیگ ن کی ترجمان مریم اورنگ زیب نے الزام عائد کیا ہے کہ وزیرِ اعظم عمران خان کے حکم پر مافیا اشیاء مہنگی کرتی ہے۔

 لاہور کی احتساب عدالت کے باہر میڈیا سے گفتگو کرتے ہوئے مسلم لیگ ن کی ترجمان مریم اورنگ زیب کا کہنا ہے کہ مافیا حکومت جان بوجھ کر بحران پیدا کرتی ہے۔

انہوں نے کہا کہ آج ملک میں ایل این جی کا 122 ارب کا ڈاکا پڑ گیا، پہلے ایل این جی کا بحران پیدا کیا گیا، پھر تاخیر سے آرڈر کیا گیا۔

مسلم لیگی رہنما نے کہا کہ 122 ارب کے ڈاکے پر کون ان سے سوال کرے گا؟ ابھی مزید 25 ارب روپے جنوری میں دیئے جائیں گے۔

انہوں نے کہا کہ وزیرِ اعظم عمران خان کی اے ٹی ایمز کے ذریعے مہنگی بجلی گیس فروخت کی جائے گی، ان سے کوئی سوال کرنے والا نہیں ہے۔

ترجمان ن لیگ کا کہنا ہے کہ مینارِ پاکستان میں عوام نے جمِ غفیر دیکھا، اب ان آٹے اور چینی کے چوروں کو ان کے گھر بھیجنا ہے۔

ان کا مزید کہنا ہے کہ یہ بحران صرف اے ٹی ایم کی جیبیں بھرنے کےلیے پیدا کیے جاتے ہیں، 23 فارن فنڈنگ اکاؤنٹس، کرپشن، چوری اور ڈاکے کا جواب دینا پڑے گا۔