وفاقی وزیر فواد چوہدری کا کہنا ہے کہ کسی میں وزیراعظم عمران خان کے خلاف تحریک عدم اعتماد لانے کی جرات نہیں۔

تفصیلات کے مطابق سماجی را بطے کی ویب سائٹ ٹو ئٹر پر جا ری اپنے پیغام میں وفاقی وزیر سائنس و ٹیکنالوجی فواد چوہدری نے کہاکہ اپوزیشن کے پاس نہ کوئی حکمت عملی ہے اور نہ ہی پلان، وہ استعفوں سے شروع ہوئے اور جلسوں پر رکے، اب وہاں بھی بس ہو گئی تو عدم اعتماد کی گفتگو کررہے ہیں، کس مائی کے لعل کی جرآت ہے کہ وہ وزیر اعظم کے خلاف تحریک عدم اعتماد لائے، آپ تاعمر قید اور نااہلی سے بچ گئے تو غنیمت سمجھیے گا۔

اپوزیشن کے پاس نہ کوئ حکمت عملی ہے نہ پلان، استعفوں سے شروع ہوئے جلسوں پر رکے اب وہاں بھی بس ہو گئ تو عدم اعتماد کی گفتگو، کس مائ کے لال کی جرآت ہے وزیر اعظم کیخلاف تحریک عدم اعتمادلانے کی، آپ تاعمر قید اور نااھلی سے بچ گئے تو غنیمت سمجھئے گا،کیا پدی اور کیا پدی کا شوربہ

— Ch Fawad Hussain (@fawadchaudhry) January 24, 2021

انھوں ںے اپنی ٹوئٹ کے اختتام میں لکھا، کیا پدی اور کیا پدی کا شوربہ۔

واضح رہے کہ دو روز قبل پیپلز پارٹی کے چیئرمین بلاول بھٹو زرداری نے کہا تھا کہ جلسے جلوسوں کو کوئی فائدہ نہیں ، اگر موجودہ حکومت کو ہٹانا ہے تو اسمبلی میں تحریک عدم اعتماد لانی پڑے گی۔

اس بیان پر مسلم لیگ (ن) کے رہنما احسن اقبال نے کہا تھا کہ اگر بلاول بھٹو زرداری کے پاس اسمبلی میں تحریک عدم اعتماد کو کامیاب کرانے کے لئے درکار ارکان ہیں تو تحریک لے آئیں۔