وزیر اعظم عمران خان کا کہنا ہے کہ  موسمیاتی تبدیلیوں سے نمٹنے  کے لیے ہمیں بطور قوم خود کو بدلنا ہوگا۔

تفصیلات کے  مطابق  غازی بروتھا میں شجر کاری مہم کی تقریب سے خطاب  کرتے ہوئے وزیر اعظم عمران خان کا  کہنا تھا کہ  ماضی میں جنگلات کو بےدردی سے ختم کیا گیا۔

عمران خان نے کہا کہ موسمیاتی اثرات میں کمی  کے لیے بلین ٹری منصوبے کو کامیاب کرنا ہوگا، انگریز جو جنگلات چھوڑ کر گئے تھے ہم نے وہ بھی ختم کردیئے۔

انہوں نے کہا کہ لاہور میں 20 سال کے دوران 70 فیصد درخت کاٹ دیے گئے،موسم کی تبدیلی سے ہم بہت متاثر ہوں گے۔دنیا میں موسم بدل رہا ہے،اپنی تقدیر بدلنے  کے لیے فیصلہ کرنا ہوگا ،ٹین بلین ٹری منصوبے کو کامیاب کریں ۔

وزیر اعظم نے کہا کہ  کھیلوں کے میدان ہمارے نوجوانوں کی صحت  کے لیے ضروری ہیں۔نوجوانوں کو کھیلوں کے میدان فراہم کرنا اولین ترجیح ہے، اس علاقے میں 10 کرکٹ گراؤنڈز بنائیں گے۔

عمران خان نے مزید کہا کہ  منی لانڈرنگ کرپشن سے بھی بڑا جرم ہے، اقامہ لے کر بیرون ملک پیسے بھیجنے سے ملک کمزور ہوتا ہے۔

ان کا کہنا تھا کہ  سابقہ حکمرانوں نے ایسی فضا بنا دی کہ کرپشن بری چیز نہیں رہی، ہمیں سب سے زیادہ نقصان کرپشن نے پہنچایا، جب وزیراعظم اور وزرا ءکرپشن کریں تو ملک تباہ ہوجاتا ہے۔

وزیر اعظم نے کہا کہ  خیبرپختونخوا میں سب کو صحت کارڈ کی سہولت فراہم کی ہے۔