سندھ حکومت کی جانب سے ڈبل سواری پر عائد کی جانے والی پابندی کو ختم کردیا گیا ہے۔

تفصیلات کے مطابق صوبائی وزیر مرتضیٰ وہاب نے آج پریس کانفرنس کرتے ہوئے بتایا ہے کہ سندھ بھر میں ڈبل سواری پر پابندی ختم کردی گئی ہے۔

انہوں نے بتایا ہے کہ لاک ڈاؤن کے دوران ڈبل سواری پر کسی کو نہیں روکا جائیگا، اس حوالے سے احکامات جاری کردیئے گئے ہیں۔

انہوں نے مزید کہا ہے کہ پابندی کی وجہ سے لوگوں کو ویکسیشن میں دشواری پیش آرہی تھی تاہم گزشتہ روز عائد کی جانے والی ڈبل سواری پر پابندی کو اب ختم کردیا گیا ہے۔

مرتضیٰ وہاب نے بتایا ہے کہ گزشتہ 24 گھنٹوں کے دوران 1 لاکھ 85 ہزار اور 406 افراد نے ویکسین لگوائی ہے۔

انہوں نے مزید بتایا ہے کہ سندھ بھر میں ریسٹورینٹ، دودھ اور بیکری  کی دکانوں پر پابندی کو بھی ختم کیا جارہا ہے۔

لاک ڈاؤن کے حوالے سے انہوں نے بتایا کہ اس وقت لاک ڈاؤن وقت کی ضرورت ہے  اور صرف انتظامیہ ہی اس بات کو سمجھ سکتی ہے۔

مرتضیٰ وہاب نے کہا ہے کہ اسلام آباد میں بیٹھنے والے زمینی حقائق نہیں سمھجتے ہیں جبکہ ہمیں کراچی سے براہ راست تمام تر معلومات حاصل ہورہی ہوتی ہیں۔

ان کا کہنا ہے کہ کورونا کی نئی لہر کے باعث کراچی میں کورونا کیسز میں 5 گناہ اضافہ ریکارڈ کیا گیا ہے جو کہ باعث تشویش ہے۔

انہوں نے بتایا ہے کہ سرکاری اسپتالوں میں  مریضوں کے لئے گنجائش صرف 70 فیصد رہ گئی ہے جبکہ نجی ادارے اپنی پوری گنجائش کے ساتھ کام کر رہے ہیں۔