وزیراعظم عمران خان کے مشیر برائے احتساب اور داخلہ بیرسٹر مرزا شہزاد اکبر نے کہا ہے کہ بلاشبہ وزیراعظم عمران خان نے عالمی سطح پہ اسلاموفوبیا کے خلاف مقدمہ لڑا۔

شہزاد اکبر نے سماجی رابطے کی ویب سائٹ ٹوئٹر پر اپنے ایک بیان میں کہا کہ عمران خان نے عالمی سطح پہ اسلاموفوبیا کے خلاف مقدمہ لڑا اور آج اس بات کے حق میں اٹھنے والی آواز عمران خان کی اپروچ پہ مہر تصدیق ثابت کر رہی ہے۔

بلا شبہ وزیراعظم عمران خان نے عالمی سطح پہ اسلاموفوبیا کے خلاف مقدمہ لڑا اور آج اس بات کے حق میں اٹھنے والی آواز عمران خان کی اپروچ پہ مہر تصدیق ثبت کر رہی ہے pic.twitter.com/BuICBlnodw

— Mirza Shahzad Akbar (@ShazadAkbar) December 24, 2021

واضح رہے کہ آج روسی صدر ولادیمیر پیوٹن نے اپنے ایک بیان میں کہا ہے کہ پیغمبر اسلام ﷺ کی توہین آزادی اظہار میں شمار نہیں ہوتی۔

روسی خبر رساں ادارے کے مطابق پیوٹن نے سالانہ نیوز کانفرنس کے دوران  کہا کہ پیغمبر اسلام ﷺ کی توہین مذہبی آزادی اور مذہب اسلام سے تعلق رکھنے والے لوگوں کے مقدس جذبات کی خلاف ورزی ہے۔

انہوں نے دوسری جنگ عظیم میں مرنے والے نازیوں اور ’لافانی رجمنٹ ‘ کے عنوان والی روسیوں کی تصویر کے ویب سائٹس پر پوسٹ کرنے پر بھی تنقید کی۔

روسی صدر نے کہا کہ یہ کارروائیاں انتہا پسندانہ انتقامی کارروائیوں کو جنم دیتی ہیں۔

عام طور پر فنکارانہ آزادی کی تعریف کرتے ہوئے پیوٹن نے کہا کہ اس کی اپنی حدود ہیں لیکن اس کے ذریعے دوسری آزادیوں کی خلاف ورزی نہیں کرنی چاہیے۔