شہباز گل نے کہا ہے کہ وزیراعظم عمران خان ایمانداری سے سیاست کر رہے ہیں۔

وزیراعظم کے معاون خصوصی برائے سیاسی ابلاغ ڈاکٹر شہباز گل نے اوورسیز کنونشن سے خطاب کرتے ہوئے کہا کہ سیاست کو ایمانداری سے کرنا بہت مشکل ہے۔

شہباز گل نے کہا کہ وزیراعظم عمران خان ایمانداری سے سیاست کر رہے ہیں ، وزیراعظم پاکستان کو ایک خوشحال اور پھلتا پھولتا ملک بنانے کے لئے اپنی لگن اور دیانت کی قیمت ادا کر رہے ہیں۔

انہوں نے 2013 میں پاکستان مسلم لیگ (ن) کے قائد نواز شریف کی کابینہ میں شامل ناموں کی یاد دہانی کراتے ہوئے کہا کہ خواجہ آصف جو اس کابینہ کا حصہ تھے ان کا نام یو اے ای کی کمپنی، سیالکوٹ کی جعلی ہاؤسنگ سوسائٹی، جعلی چاولوں کے کاروبار اور کالا دھن بنانے میں شامل تھا۔

شہباز گل کا کہنا تھا کہ احسن اقبال کے بھائی نے پنجاب میں 300,000 روپے کے پودے بیچے جس کی دستاویزات بھی موجود تھیں اور لاہور کے تمام ٹھیکے بھی انہیں دے دیئے گئے۔

ان کا یہ بھی کہنا تھا کہ کرپشن میں اسحاق ڈار کا نام ہی کافی ہے جبکہ پرویز رشید بھی ڈیفالٹر ہیں۔ اسحاق ڈار نے نوازشریف کیلئے منی لانڈرنگ کی ، اسحاق ڈار نے حضرت داتا گنج بخش کے نام پر بھی کمپنی بنا کرلوٹ مار کی جبکہ اسحاق ڈارنے ورلڈ بینک میں جعلی اعداد وشمار جمع کرائے اور جب جعلی اعداد و شمار پر پکڑےگئے تو کہا ٹائپو ایرر ہے۔

وزیراعظم کے معاون خصوصی برائے سیاسی ابلاغ ڈاکٹر شہباز گل کا مزید کہنا تھا کہ ایک اچھا کپتان کبھی بھی بری ٹیم کا انتخاب نہیں کر سکتا جبکہ ہم اس وقت تک کامیاب اور خوشحال ملک نہیں بن سکتے جب تک ہم اپنی اخلاقیات کو ٹھیک نہیں کرتے۔