مشترکہ اپوزیشن کی قیادت نے کہا ہے کہ حکومت کو گھر بھیج کر ہی واپس آئیں گے۔

متحدہ اپوزیشن کی جانب سے جاری کردہ مشترکہ اعلامیے کے مطابق متحدہ اپوزیشن کی لانگ مارچ کی تیاریوں اور انتظامات و حکمت عملی کے متعلق اہم مشاورتی اجلاس منعقد ہوا۔

اجلاس میں اپوزیشن جماعتوں کا لانگ مارچ اور اسلام آباد جلسے کی تیاری کے متعلق تفصیلی مشاورت کی گئی ہے۔

 جاری کے جانے والے اعلامیے میں بتایا گیا ہے کہ 26 مارچ کو سرگودھا ڈویژن سے ہزاروں کارکنان اسلام آباد پہنچ کر لانگ مارچ کا حصہ بنیں گے جن کے لئے تمام تر انتظامات مکمل کئے جارہے ہیں۔

اعلامیے میں کہا گیا ہے کہ اپوزیشن عمران خان کی کرپٹ حکومت کے خاتمے کیلئے عوام اپنا تاریخی کردار ادا کریں گے اور حکومت کو گھر بھیج کر ہی واپس آئیں گے۔

خیال رہے کہ اجلاس میں اپوزیشن جماعتوں کے مقامی قائدین شاہ نواز رانجھا۔ مفتی شاہد مسعود ۔نعمان مہوٹہ۔ عبدالستار گجر و دیگر نے شرکت کی۔

واضح رہے کہ متحدہ اپوزیشن کی جانب سے وزیراعظم عمران خان کے خلاف قومی اسمبلی میں تحریک عدم اعتماد جمع کرائی گئی ہے ۔

 اس تحریک کو کامیاب بنانے کے لئے اپوزیشن کی طرف سے ہر ممکن کوشش کی جارہی ہے اور اسی سلسلے میں عدم اعتماد سے پہلے جلسے اور ریلیوں کا اعلان کیا گیا ہے ۔

 دوسری جانب وزیراعظم عمران خان اپنی پارٹی کی قیادت سمیت اس تحریک کو ناکام بنانے کی کوششوں میں مصروف نظر آرہے ہیں ۔

 اسی سلسلے میں وزیراعظم عمران خان نے 27 مارچ کو ڈی چوک پر عوامی جلسے کا اعلان کیا ہے اور ساتھ ہی دعویٰ بھی کیا ہے کہ اس جلسے میں 10 لاکھ عوام اپنی شرکت کو یقینی بنائے گی۔